Daxili siyasət

Ana səhifə

Daxili siyasət

AXCP ilə Müsavat Partiyası arasında yenidən problem yaranıb

13 may 2008 13:39 (UTC +04:00)

Bakı. Elnur Məmmədli APA. “Müsavat Partiyasının “Azadlıq” bloku ilə heç bir problemi yoxdur. Biz bu bloku Rusiyaya işləməkdə ittiham etməmişik. Ona görə də blokun nümayəndələrinin Müsavat Partiyasının ünvanına ağır ittihamlar səsləndirməsi absurd və gülüncdür”. Bunu APA-ya açıqlamasında Müsavat Partiyası Mərkəzi İcra Aparatının rəhbəri Arif Hacılı deyib. Onun sözlərinə görə, “Azadlıq” blokunun təmsilçiləri “Yeni Müsavat” qəzetində yazılmış bir məqaləni əsas götürərək neçə gündür ki, Müsavat Partiyasını hədəfə götürüblər: “Əgər hansısa qəzet və ya onun əməkdaşı iddia edirsə ki, “Azadlıq” bloku Moskvanın maraqlarına uyğun siyasət yeridir, cavab qəzetə verilməlidir, Müsavat Partiyasına yox. Xüsusilə ona görə ki, hamıya, o cümlədən bizi ittiham edən şəxslərə də məlumdur ki, Müsavat Partiyasının “Yeni Müsavat” qəzeti üzərində heç bir nəzarəti yoxdur”.
Azərbaycan Xalq Cəbhəsi Partiyasının (AXCP) sədr müavini Həsən Kərimov isə blokun Moskvaya işləməsi ilə bağlı informasiyaların arxasında Müsavat rəhbərliyinin dayandığını söyləyib. Onun sözlərinə görə, burada məqsəd bloku nüfuzdan salmaqdır: “AXCP-nin və “Azadlıq” blokunun Moskva ilə heç bir əlaqəsi yoxdur. Bu kimi fikirlərin ortaya atılması ictimai rəyi çaşdırmağa xidmət edir”. H. Kərimov bu məlumatın Müsavata yaxın qəzetdə getdiyini əsas gətirərək, belə informasiyaların yayılmasında həmin partiyanın rəhbərliyinin də əlinin olduğunu düşünür.