Daxili siyasət

Ana səhifə

Daxili siyasət

Qurtuluş günü Azərbaycanın varlığı ilə yoxluğu arasında incə cizgi idi - RƏY

12 iyun 2026 11:46 (UTC +04:00)

Yenicə müstəqilliyinə qovuşmuş Azərbaycanın Heydər Əliyev tarixi şəxsiyyəti ilə birləşməsi o zamanki Azərbaycanın müstəqilliyini qoruyub saxlamasının ən həlledici məqamlarından biri idi.
APA xəbər verir ki, bunu parlamentin bu gün keçirilən plenar iclasında Milli Məclis sədrinin birinci müavini Əli Əhmədov deyib.
Əli Əhmədov bildirib ki, Heydər Əliyevin qayıdışı olmasaydı, Azərbaycanın taleyi tamamilə başqa cür olardı: “Azərbaycanın möhtəşəm tarixi qələbəsi – Qarabağın azad olunması da öz başlanğıcını Heydər Əliyevin tarixi qayıdışından götürüb. Prezident İlham Əliyevin bundan sonra da əldə edəcəyi nailiyyətlərdə Qurtuluş məfkurəsi özünü göstərəcək”.
Milli Məclisin İnsan hüquqları komitəsinin sədri Zahid Oruc qeyd edib ki, 15 iyun milli siyasi təqvimdə yalnız 1993-cü ilin hadisələri ilə bağlı deyil, çarizmdən Cümhuriyyətə, Sovetlərdən müstəqilliyə qədər uzanan yüzillik tarixin simvoludur: “İki əsr boyu Azərbaycana ya çarizmin canişinləri, ya qırmızı komissarlar, ya da Moskvanın adamları başçılıq edirdi. 1969-cu ildə ilk dəfə bir şəxsiyyət həm Azərbaycanın, həm də imperiyanın rəhbərliyində təmsil olundu. Əsl Milli Qurtuluş həmin tarixdən başlanır. Atatürkdən fərqli olaraq, Ulu Öndər altı yüz illik tarixi miras üzərində deyil, totalitar sistemin içərisindən çıxaraq xalqını gələcək müstəqilliyə hazırladı və dövlət quruculuğuna rəhbərlik etdi. Heydər Əliyevin Kremldən Bakıya, oradan Naxçıvana, nəhayət, 1993-cü ildə ikinci dəfə hakimiyyətə qayıdışı Zəfərimizin təməllərinin qoyulduğu Böyük Qayıdış hadisəsidir. Biz Qurtuluşdan Zəfərə gedən yolda məğlubiyyətə və işğala son qoyduq, imperiya paytaxtlarından idarə olunmaqdan, daimi torpaq itkilərindən və ömürlük köçkünlükdən əbədi xilas olduq”.
Deputat Vüqar İskəndərov vurğulayıb ki, Qurtuluş günü Azərbaycanın varlığı ilə yoxluğu arasındakı o incə cizgi idi: “Məhz belə bir taleyüklü məqamda xalqımızın təkidli tələbi və böyük inamı ilə Ulu Öndər Heydər Əliyevin hakimiyyətə qayıdışı Azərbaycanı real məhvdən xilas etdi. İyunun 15-də dahi şəxsiyyətin Ali Sovetin sədri seçilməsi ilə ölkəmizdə qurtuluş fəlsəfəsinin və milli birliyin təməli qoyuldu. Ümummilli Lider öz siyasi dühası, zəngin dövlətçilik təcrübəsi və sarsılmaz qətiyyəti ilə qısa müddətdə ölkədə daxili sabitliyi bərpa etdi, qanunsuz silahlı qruplaşmaları zərərsizləşdirdi və nizami ordunun qurulmasına nail oldu. “Əsrin müqaviləsi” ilə iqtisadi müstəqilliyimizin, ardınca isə hüquqi dövlət quruculuğunun təməli möhkəmləndirildi. Bu gün biz tamamilə fərqli, qürurlu və qüdrətli bir Azərbaycanda yaşayırıq. Ulu Öndərin uzaqgörənliklə əsasını qoyduğu dövlətçilik strategiyası son 20 ildən artıq dövrdə Müzəffər Ali Baş Komandan, Prezident İlham Əliyev tərəfindən misilsiz uğurlarla davam etdirilib. Milli Qurtuluş Gününün bizə qazandırdığı ən böyük strateji hədəf respublikamızın ərazi bütövlüyünün və dövlət suverenliyinin tam bərpası oldu”.