Daxili siyasət

Ana səhifə

Daxili siyasət

Professor: "Antibiotiklər reseptsiz satılmamalıdır"

01 mart 2018 09:57 (UTC +04:00)

“Antibiotiklərin qəbuluna göstəriş olmalıdır. Azərbaycanda antibiotiklər reseptsiz satılmamalıdır. Deyə bilmərəm ki, bunu etməyə hansı səbəblər mane olur. Bu, təşkilati məsələdir. Yəqin ki, buna heç nə mane olmur”.

APA-nın məlumatına görə, bu sözləri Azərbaycan Tibb Universitetinin (ATU) II uşaq xəstəlikləri kafedrasının professoru Surxay Musayev “1 mart İmmunitet günü”nə həsr olunmuş tədbirdə deyib. O bildirib ki, insanların yerli-yersiz antibiotik qəbul etməsi ən təhlükəli məsələlərdən biridir: “Çox təəssüf ki, bizim ölkəmizdə də insanlar antibiotikə meyllidir. Baş ağrıyanda, burun axanda, öskürəndə antibiotik içirlər. Bu, immun sistemə dağıdıcı təsir göstərən ən ciddi amillərdən biridir. Bunu nəzərə alaraq, Avropada antibiotik qəbuluna nəzarət edən xüsusi komissiyalar var. Həmin komissiyanın qərarı olmadan, tibb işçisinin antibiotik təyin etmək hüququ yoxdur. Mən düşünürəm ki, bunun vaxtı bizdə də çatıb. Türkiyədə artıq qərar qəbul olunub ki, antibiotiklər apteklərdə reseptsiz satılmasın. Bu, doğru qərardır. Amma bu, o demək deyil ki, antibiotiki tamamilə qəbul etmək lazım deyil. Mən həkim kimi əhaliyə tövsiyə edirəm ki, antibiotikləri təyinatsız qəbul etməsinlər. Əgər tövsiyə təsir göstərməsə, çox güman ki, məcburi qayda olacaq ki, Azərbaycanda da antibiotiklər hər kəsə istədiyi səviyyədə satılmasın”.

S. Musayev qəbul olunan suyun çirkli olması məsələsinə də toxunub. O deyib ki, insanlar qidalanmada ərzaqlara fikir versələr də, içdikləri suya diqqət etmirlər: “Sularımız çirklidir. Bəzi ailələr imkan daxilində filtrlər alırlar. Amma buna baxmayaraq, biz nə dərəcə təmiz su içirik?..”