Orta Dəhliz inkişafının çox mühüm mərhələsinə qədəm qoyur. Uzun illər ərzində Orta Dəhliz haqqında Asiya ilə Avropa arasında sadəcə alternativ nəqliyyat marşrutu kimi danışmışıq. Bu gün isə düşünürəm ki, ona daha geniş prizmadan yanaşmalıyıq.
“APA-Economics” xəbər verir ki, bu barədə “Silk Way West Airlines” şirkətinin vitse-prezidenti Vüqar Məmmədov “Alman- Azərbaycan Strateji Tərəfdaşlıq və Bağlantılar Konfransı 2026” tədbirində çıxışı zamanı bildirib.
Onun sözlərinə görə, məqsəd sadəcə başqa bir marşrut yaratmaq olmamalıdır: “Məqsəd inteqrasiya olunmuş, etibarlı və rəqabətqabiliyyətli təchizat zənciri ekosistemi yaratmaq olmalıdır. Bu fərq vacibdir. Çünki dəhliz yalnız onu təşkil edən ayrı-ayrı hissələr arasındakı bağlantılar qədər güclüdür.
Dəmir yolları təcrid olunmuş şəkildə fəaliyyət göstərə bilməz. Limanlar da təcrid olunmuş şəkildə fəaliyyət göstərə bilməz. Aviaşirkətlər də eyni vəziyyətdədir. Gömrük və rəqəmsal sistemlər də daxil olmaqla, bütün bu elementlər birlikdə işləməlidir.
O qeyd edib ki, Azərbaycan bu əlaqələndirici rolu oynamaq üçün xüsusilə əlverişli mövqedədir: “Coğrafi baxımdan biz Mərkəzi Asiya, Xəzər dənizi, Cənubi Qafqaz, Türkiyə və Avropanın arasında yerləşirik. Lakin təkcə coğrafi mövqe kifayət etmir. Coğrafi mövqeyi real rəqabət üstünlüyünə çevirmək üçün infrastruktur, daşıma imkanları və bu müxtəlif elementlərdən istifadə edib onları birləşdirə bilən operatorlar lazımdır. Hesab edirəm ki, Azərbaycan bu istiqamətdə əhəmiyyətli irəliləyiş əldə edib. “Silk Way West Airlines” olaraq uzun illərdir Bakı şəhərini qlobal yükdaşıma qovşağına çevirmək istiqamətində fəaliyyət göstəririk. Bu gün şəbəkəmiz Azərbaycanı Avropa, Asiya, Yaxın Şərq və Amerika qitəsindəki əsas bazarlarla birləşdirir”.
Vüqar Məmmədov bildirib ki, Almaniya bu sistemin xüsusilə mühüm hissəsidir: “Hazırda Azərbaycan və Almaniya arasında həftədə 12 uçuş həyata keçiririk. Buna görə də iki ölkə arasında bağlantıdan danışarkən, bizim üçün bu, nəzəri bir anlayış deyil. Bu bağlantı artıq mövcuddur. Təyyarələr Bakı ilə Almaniya arasında müntəzəm olaraq yük daşıyır,
Almaniya sənayesini və istehlakçılarını təkcə Azərbaycanla deyil, Bakı vasitəsilə daha geniş coğrafiya ilə əlaqələndirir. Məhz burada aviasiya Orta Dəhlizə əlavə bir ölçü qazandıra bilər. Ənənəvi olaraq Orta Dəhliz haqqında danışarkən əsasən dəmir yolu və dəniz nəqliyyatını nəzərdə tuturuq. Əlbəttə, bu nəqliyyat növləri dəhlizin əsasını təşkil etməkdə davam edəcək. Lakin bütün yüklərin tələbləri eyni deyil. Bəzi yüklər üçün qiymət əsas amildir, bəziləri üçün isə vaxt daha böyük əhəmiyyət daşıyır”.
Bizi Telegram-da izləyin
t.me/apa_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
