USD 1.7

Bakı 10 °C

Ödənişli xəbərlər

AZ RU EN FA FR

Gece modu

SİYASƏT

XƏBƏR

Dünya xəbərləri

İqtisadiyyat xəbərləri

İdman xəbərləri

Mədəniyyət xəbərləri

Təhlil

Bloqlar

Şirkət

TOP 10

APA TV

© 2004 - 2026 Bütün müəllif hüquqları qorunur.

Diaspor

Diaspor

Aleks Şapiro Suliman: “Azərbaycanın oğulları onun milli maraqlarını İsraildə layiqincə təmsil və müdafiə etməyə hazırdır”

10 may 2007 09:22 (UTC +04:00)

Aleks Şapiro Suliman 1963-cü ildə Azərbaycanda anadan olub. Moskva Sənaye İnstitutunun hüquq fakültəsini bitirib. SSRİ Mədəniyyət Nazirliyi sistemində müxtəlif vəzifələrdə çalışıb. Nazirliyin İsraildə xüsusi nümayəndəsi olub.

- İsrail-Azərbaycan Beynəlxalq Assosiasiyasının (AZİZ) yaradılmasında məqsəd nədir?
- Neçə illərdir burada yaşamalarına baxmayaraq, Azərbaycandan İsrailə köçmüş insanlarda doğulduqları, oxuduqları, işləməyə başladıqları və həyatlarının ən yaxşı illərini keçirdikləri ölkə haqqında nostalji hissləri qalıb. Azərbaycanda dostlarımız, həmkarlarımız, qonşularımız, doğmalarımızın məzarları qalıb. İsraildəki azərbaycanlıları birləşdirəcək vahid qurumun yaradılması ideyası ötən illər ərzində dəfələrlə gündəmə gəlib. Hayfa, Netaniya, Akko, Beer-Şeva və Rişan-Le-Sion şəhərlərində Azərbaycan cəmiyyətləri vardı, lakin müxtəlif səbəblərə görə onlar bir araya gələ bilmirdilər. Birləşdirici mərkəz, təşkilati və maddi resurslar, İsraillə Azərbaycan arasında dövlətlərarası münasibətlər yox idi. Azərbaycan isə müstəqilliyinin ilk illərindən etnik separatizmlə üzləşdi, Ermənistanla elan olunmamış müharibə aparmalı oldu. Nəticədə Azərbaycan ərazilərinin 20 faizi işğal edildi, 1 milyon insan qaçqın və məcburi köçkün vəziyyətinə düşdü, ölkədə ağır siyasi-iqtisadi böhran yarandı. Belə vəziyyətdə olan Azərbaycanın İsraildəki diaspora ilə əlaqələr qurmaq heç yadına da düşməzdi. Ancaq bu gün çox şey dəyişib. Azərbaycanda siyasi sabitlik yaranıb, Bakı-Tiflis-Ceyhan strateji neft kəməri fəaliyyətə başlayıb və bu, Azərbaycanın iqtisadi inkişafına güclü təkan verib. Azərbaycan beynəlxalq birliyin ayrılmaz tərkib hissəsinə çevrilmək niyyətindədir və bu məqsədlə diaspora ilə iş üzrə dövlət komitəsi yaradılıb. Şübhəsiz ki, 2006-cı ilin martında İosif Şaqalın Knessetə seçilməsi iki ölkənin yaxınlaşması və assosiasiyamızın yaradılmasında mühüm rol oynadı. İsrail-Azərbaycan parlamentlərarası dostluq qrupunun sədri olan deputat İ. Şaqalın imkanları sayəsində Azərbaycan mənşəli bütün israilliləri birləşdirəcək beynəlxalq assosiasiyanın yaradılması mümkün oldu. Aprelin 12-də qurumun təsis qurultayı keçirildi və İsrailin hökumət üzvlərinin də qatıldığı toplantıda 600-dən çox nümayəndə və Azərbaycan, ABŞ, Rusiya, Türkiyə, İsveçrə kimi ölkələrdən olan qonaqlar, həmçinin Ukrayna, Belarus, Moldova və Qazaxıstan icmalarının təmsilçiləri iştirak etdi. Hələ İsraildəki heç bir icmanın toplantılarında bu səviyyədə rəsmi iştirak olmayıb.
- Təşkilatın real addımları və gələcək planları nədən ibarətdir?
- Bizim çoxlu layihələrimiz var. Bu layihələri həyata keçirmək və Azərbaycandan köçmüş insanlara real yardım göstərmək istəyirik. İyul ayında Azərbaycanda turizm nümayəndəliyi açmaq üçün buradan rəsmi şəxslərin də daxil olduğu nümayəndə heyəti Bakıya gedəcək. Cavab addımı kimi İsraildə də Azərbaycanın turizm nümayəndəliyi açılacaq. Biz assosiasiyanın qəzetini nəşr etməyə və internet saytını yaratmağa hazırlaşırıq. Bundan başqa, Azərbaycan və İsrail sahibkarları və iş adamları şurası yaratmağı da planlaşdırırıq. Bu qurum iki ölkə arasında bütün real layihələri həyata keçirəcək.
- Azərbaycan-İsrail münasibətlərinin perspektivini necə qiymətləndirirsiniz?
- Hesab edirəm ki, tezliklə İsraildə Azərbaycanın səfirliyi açılacaq. Bundan əvvəl konsulluq, daha əvvəl ticarət nümayəndəliyi, bundan öncə də turizm nümayəndəliyi açıla bilər. Azərbaycan dünyanın bir çox ölkəsində olduğu kimi, İsraildə də layiq olduğu şəkildə təmsil ediləcək. Bununla yanaşı, mən İsrail-Azərbaycan Beynəlxalq Assosiasiyasının rolunu bir daha qeyd etmək istərdim. Əminliklə demək olar ki, Azərbaycanın İsraildə ünvanı var - onun layiqli oğulları İsraildə Azərbaycanın milli maraqlarını təmsil və müdafiə etməyə hazırdır. Bizim layihələrimizdən biri bu ay İsraildə Azərbaycanın Respublika Gününün qeyd edilməsidir. İlk dəfə olaraq İsrail ərazisində - Knessetin binasında 1918-ci il mayın 28-də yaradılmış, Avropanın demokratik dəyərlərini və şərq mədəniyyətinin tarixi ənənələrini özündə harmonik şəkildə birləşdirmiş Azərbaycan Demokratik Respublikasının yaranmasının ildönümü bayram kimi qeyd olunacaq. İsraildə Azərbaycan səfirliyi olmadığından bütün təşkilati işləri İsrail-Azərbaycan Beynəlxalq Assosiasiyası öz üzərinə götürüb. Fürsətdən istifadə edərək assosiasiyanın yarandığı gündən ona informasiya dəstəyi verən APA agentliyinə və onun İsrail bürosuna təşəkkür edirəm. /APA/

İDMAN XƏBƏR

Diaspor

Azərbaycanın Təbrizdəki Baş Konsulluğunda Zəfər Gününə həsr olunmuş tədbir keçirilib