Diaspor

Ana səhifə

Diaspor

London Azərbaycan Cəmiyyətinin təşkilatçılığı ilə Cefri Verbokun konserti keçirilib

23 oktyabr 2007 14:47 (UTC +04:00)

London Azərbaycan Cəmiyyətindən APA-ya daxil olan məlumata görə, konsertdə Cefri Verbok milli musiqi alətlərimiz kamança, ud və tarda Azərbaycan muğamlarını yüksək ustalıqla ifa edib.
Tədbirdə Azərbaycanın Birləşmiş Krallıqdakı səfiri Fəxrəddin Qurbanov, Britaniya ictimaiyyətinin və bu ölkədəki Azərbaycan icmasının nümayəndələri iştirak edib.
Qeyd edək ki, amerikalı C. Verbok kamançada Azərbaycan musiqilərini ustalıqla səsləndirən azsaylı əcnəbi ifaçılardan biridir. Altı yaşından musiqi təhsili almağa başlamış Verbok 14 yaşında ilk musiqisini bəstələyib. O, 12 ildən artıq Azərbaycan musiqisinin dahi bilicisi kimi tanınan Zevulon Avşalomovdan dərs alıb. Dünya Musiqi İnstitutundan verilən məlumata görə, cənab Avşalomov C. Verboku ona mükafat kimi göndərilmiş şagird və malik olduğu biliyin həqiqi varisi adlandırıb. İncə və səlis ifası ilə tanınan məşhur kaman ustası ABŞ, Avropa və Orta Şərq ölkələrində, eləcə də Azərbaycan radiosu və televiziyasında konsert proqramları ilə çıxış edib, misilsiz muğam musiqi ənənələrini dünya tamaşaçısına təqdim edib. 2001-ci ildə Verbok Azərbaycan Dövlət Musiqi Akademiyası tərəfindən mükafatlandırılıb, 2002-ci ildə isə Smitsonia İnstitutunun İpək Yolu Festivalında Azərbaycan proqramının rəsmi aparıcısı və təmsilçisi seçilib. Bu gün də Azərbaycan muğamı üzrə peşəkar mütəxəssis kimi tanınan Verbok dünyanın bir çox yerlərində bu mövzuda məruzələr söyləyir və konsertlərlə çıxış edir.
Onu da xatırladaq ki, tədbirin təşkilatçısı London Azərbaycan Cəmiyyəti Azərbaycanı dünyada tanıtmaq məqsədilə ingilis dillində “Visions of Azerbaijan” jurnalını nəşr edərək dünyanın aparıcı kitabxana, elmi və mədəni mərkəzlərinə yayır. Cəmiyyət həmçinin Qarabağ münaqişəsinə dair həqiqətləri beynəlxalq ictimaiyyətə çatdırmaq məqsədilə www.karabakh.co.uk saytını təsis edərək, xarici müəlliflərin məqalələrindən ibarət “Azərbaycan Ermənistan Dağlıq Qarabağ münaqişəsi - beynəlxalq baxış” və “Xocalı faciəsi - beynəlxalq baxış” adlı kitabları nəşr edib. Bütün bu layihələr barədə isə www.azerbaijansociety.co.uk saytında daha ətraflı məlumat yerləşdirilib./APA/