Diaspor

Ana səhifə

Diaspor

Böyük Britaniyada “Britaniyanın Azərbaycanlı Gözəli” adlı müsabiqə keçiriləcək

14 yanvar 2008 12:23 (UTC +04:00)

“Britaniyanın Azərbaycanlı Gözəli” adlı müsabiqədə Böyük Britaniyada yaşayan 16-28 yaşlı bütün azərbaycanlı qadınlar iştirak etmək hüququna malikdirlər. İlk mərhələdə müsabiqədə iştirak etmək arzusunda olan şəxslərin ərizələri qəbul olunacaq, daha sonra isə iddiaçılar arasında müsahibə təşkil olunacaq. “Sara Xatun” Cəmiyyətindən bildiriblər ki, müsabiqə iştirakçıları, həmçinin bu təşkilat tərəfindən təmin olunan Azərbaycan milli geyimlərini də nümayiş etdirəcəklər. “Britaniyanın Azərbaycanlı Gözəli”ni münsiflər heyəti seçəcək, qalibə qiymətli hədiyyələr təqdim olunacaq. Bundan başqa, müsabiqədə “Tamaşaçıların rəğbətini qazanmış ən gözəl azərbaycanlı xanım” nominasiyasının da qalibi seçiləcək. Bu nominasiya üzrə qalib rəy sorğusu əsasında müəyyənləşdiriləcək. Müsabiqə martın 8-də keçiriləcək.
Qeyd edək ki, Azərbaycanlı Gənclər Klubunun təşəbbüsü ilə 2007-ci ilin yayında fəaliyyətə başlayan “Sara Xatun” Qadın Cəmiyyətinin əsas məqsədi Britaniyada və Avropada yaşayan azərbaycanlı xanımları bir araya gətirərək, müxtəlif layihələr həyata keçirmək, Avropada güclü Azərbaycan qadını şəbəkəsini yaratmaqdır. /APA/