Diaspor

Ana səhifə

Diaspor

Baltik ölkələrində ermənilərin törətdiyi soyqırımlarla bağlı silsilə tədbirlər keçiriləcək

12 fevral 2008 11:50 (UTC +04:00)

Bakı. Məhbubə Qasımbəyli - APA. Baltik ölkələrində fəaliyyət göstərən Azərbaycan diaspora təşkilatları fevralın 20-dən martın 31-dək ermənilərin Azərbaycan xalqına qarşı törətdikləri soyqırım aktları və işğalçılıq siyasəti ilə bağlı silsilə tədbirlər keçirəcəklər. Xarici Ölkələrdə Yaşayan Azərbaycanlılarla İş üzrə Dövlət Komitəsinin mətbuat xidmətindən APA-ya verilən məlumata görə, fevralın 26-da Estoniyadakı “Aydan” Estoniya-Azərbaycan Mədəniyyət Mərkəzi, Akademik Zərifə Əliyeva adına Şərq Xalqları Mədəniyyəti Universiteti, Litvadakı “Litva Azərbaycanlıları Cəmiyyəti”, Latviyadakı “Ocaq” Mədəniyyət Mərkəzi anım mərasimi təşkil edəcəklər. “Aydan” Eston-Azərbaycan Mədəniyyət Mərkəzinin keçirəcəyi tədbirə bu ölkənin milli münasibətlər naziri Urve Palo, Tallinn şəhərinin vitse-meri Kaiya Japinen, Estoniya parlamentinin deputatı, Estoniya-Azərbaycan dostluq qrupunun rəhbəri Eldar Əfəndiyev, deputat Evelin Sepp və diplomatik korpusun nümayəndələri qatılacaqlar. Latviyada “Ocaq” Mədəniyyət Mərkəzinin təşkil edəcəyi anım mərasimində isə Xocalı faciəsinin ildönümü ilə bağlı hazırlanan 12 dəqiqəlik “Dua” sənədli filmi nümayiş olunacaq və soyqırımı əks etdirən fotolar sərgilənəcək. Tədbirdə Azərbaycanın Latviyadakı səfiri Tofiq Zülfüqarov, Latviya Seyminin deputatları, mətbuat nümayəndələri iştirak edəcək. “Litva Azərbaycanlıları Cəmiyyəti”nin Milli İcmalar Evində faciənin ildönümü ilə əlaqədar keçirəcəyi tədbirdə də “Dua” filminin nümayişi və erməni vəhşiliyinə dair sənədli materialların paylanması nəzərdə tutulub.