Diaspor

Diaspor

ABŞ Azərbaycanlıları Şəbəkəsinin baş katibi: “Prezident seçkilərində dəstəklədiyimiz namizədlər Dağlıq Qarabağ münaqişəsinin Azərbaycanın ərazi bütövlüyü çərçivəsində həllinə tərəfdar insanlardır”

14 fevral 2008 10:41 (UTC +04:00)

- Dünən ABŞ Azərbaycanlıları Şəbəkəsi fəaliyyətinin bir ayına yekun vurdu. Bu qısa müddət ərzində hansı irəliləyişlər əldə edibsiniz?
- Amerika Azərbaycanlıları Şəbəkəsinin (USAN, www.USAzeris.org) fəaliyyətinin ilk ayı çox məhsuldar oldu. Ötən ay əsas məqsədlərimizdən biri ABŞ prezidentinin, konqresmenlərin, senatorların, qubernatorların diqqətini Amerikada yaşayan soydaşlarımıza yönəltmək idi. Əminliklə qeyd etmək olar ki, biz buna nail olmağa başlamışıq. Belə ki, USAN-ın təqdim etdiyi sistemdən istifadə edərək ABŞ-da yaşayan həmvətənlərimiz ABŞ rəsmilərinə birbaşa və kütləvi şəkildə məktublar ünvanlaya bilərlər. Bizdə olan məlumata görə, indiyə qədər artıq 8,800-yə yaxın məktub, faks və elektron məktub ABŞ rəsmilərin ünvanına çatıb. Məktublar əsasən ABŞ prezidenti, vitse-prezident, qubernatorlar, dövlət katibləri, ölkənin aşağı və yuxarı palatasının üzvlər, kütləvi informasiya vasitələrinə göndərilib. Göndərilən məktublar əsasən, 20 Yanvar faciəsinin 18 illiyi, Əfqanıstanda Azərbaycan sülhməramlılarının kontingentinin tərkibinin iki dəfə artırılması, Xocalı soyqırımı, Dünya Bankının Azərbaycandakı iqtisadi göstəricilər barədə açıqlaması, konqresmenlərə Azərbaycanla bağlı işçi qrupuna qoşulmaq üçün çağırış, yəhudilərin əsrlər boyu Azərbaycanda yerli əhali ilə sülh və qardaşlıq şəraitində yaşaması, 1988-ci il Sumqayıt hadisələri barədə həqiqətlər, Demokrat Partiyasının prezidentliyə namizədlərindən Barak Obamanın çıxışına Amerika Azərbaycanlılarının mənfi reaksiyası, Azərbaycan üçün önəmli olan digər bir sıra məsələləri əhatə edib. Bizdə olan məlumata görə, həmvətənlərimiz tərəfindən kütləvi şəkildə daxil olan məktublarda əks olunan məsələlərlə bağlı bəzi ABŞ rəsmiləri artıq öz mövqelərini bildiriblər. Məsələn, Xocalı faciəsi, Azərbaycanda mövcud olan dini və etnik tolerantlıq, 20 yanvar faciəsi haqqında ölkə rəsmilərdən müxtəlif cavablar daxil olub. Təbii ki, biz fəaliyyətimizi bununla məhdudlaşmaq fikrində deyilik. Layihə getdikcə genişlənməkdə və şəbəkəyə qoşulan Amerika azərbaycanlılarının sayı gündən-günə artmaqdadır. Hədəfimiz 2008-ci ildə keçiriləcək prezident seçkilərinə qədər göndərilən məktubların sayını 100 minə, şəbəkənin üzvlərinin sayını 5 minə çatdırmaqdır.
- Yaxın gələcəkdə USAN-ın ABŞ azərbaycanlılarının vahid virtual hərəkət mərkəzinə çevriləcəyini söyləmək olarmı?
- Erməni diasporu qeyd olunan sistemdən böyük uğurla istifadə etməkdədir. Son zamanlar türk diasporu da bu üsuldan istifadə etməyə başlayıb və bu addım Amerikada yaşayan türklərinin ABŞ rəsmilərinə təsirini artırıb. Bu səbəbdən biz qeyd olunan layihəyə nikbin yanaşırıq. Məqsədimiz ancaq azərbaycanlıların səsini ABŞ rəsmilərinə çatdırmaq deyil. USAN Amerikada yaşayan çoxsaylı azərbaycanlı icmasının təkmilləşməsini, milli maraqlarımızı təmsil edən hər bir vətəndaşımızın bu işə cəlb olunmasını qarşısına məqsəd qoyub. Təşkilatımızın İdarə Heyətinə 1957-ci ildən fəaliyyətdə olan Amerika Azərbaycan Cəmiyyətinin prezidenti Tomris Azəri, Azərbaycan-ABŞ münasibətlərinin inkişafında böyük rol oynamış, hazırda ABŞ-Azərbaycan Sahibkarları Şurasına rəhbərlik edən, fəlsəfə elmləri namizədi Ceyhun Mollazadə, müasir Azərbaycan diasporunun inkişafında böyük rola malik, Azərbaycan Amerika Şurasının və USAZeris şəbəkəsinin Qərb regionu üzrə rəhbəri Cavid Hüseynov, şəbəkənin Şərq regionu üzrə rəhbəri Leyla Məmmədova, təşkilatın maliyyə işləri üzrə müdiri Bədir Məmmədli, Azərbaycana aid ilk internet səhifəsinin müəllifi, Qarabağ həqiqətləri və Azərbaycanın tarixi haqqında önəmli məqalələrin müəllifi və hazırda şəbəkənin direktoru olan Adil Bağırov daxildir. İnanıram ki, illər boyu dünyaya Azərbaycan haqqında həqiqətləri çatdırmış, milli maraqlarımızı təbliğ etmiş və heç bir zaman ruhdan düşməmiş bu soydaşlarımız USAN-ın fəaliyyətinin daha da genişlənməsinə və vahid virtual hərəkatın böyük bir diaspora təşkilatına çevrilməsində böyük rol oynayacaq.
- Bu il ölkədə keçirilən seçkilərdə USAN diaspora tariximizdə ilk dəfə olaraq konkret prezidentliyə namizədlərə dəstək verdi. Sizin bu addımınız ABŞ siyasi aləmində azərbaycanlıların tanınmasına nə dərəcədə kömək edib?
- Respublikaçılar partiyasının namizədi Con Makkeyn və Demokratlar Partiyasının namizədi Hillari Klintona dəstək verməyimiz müəyyən məqsəd daşıyır. Aydındır ki, hazırkı mərhələdə ABŞ azərbaycanlılarının bu ilki prezident seçkilərinin nəticələrinə hər hansı bir formada təsirindən danışmaq hələ tezdir. Namizədlərin ilkin partiyadaxili seçkilərin nəticələrinin müəyyən olunması və noyabrda keçiriləcək yekun seçkilərə hələ bir neçə ay vaxt qalıbdır. Amerika Azərbaycanlılarının Şəbəkəsinin məhz bu vaxt fəaliyyətə başlaması təsadüf deyil. Gələcək aylarda qeyd olunan namizədlərə dəstəyimiz tədricən artacaq və ABŞ-da yaşayan Azərbaycan icması üzvlərinin səsləri məcazi mənada namizədlər tərəfindən eşidiləcək. Qeyd etmək lazımdır ki, dəstəklədiyimiz namizədlər Azərbaycan-Amerika əlaqələrinin inkişafında maraqlı olan və Dağlıq Qarabağ münaqişəsinin Azərbaycanın ərazi bütövlüyü çərçivəsində həllinə tərəfdar insanlardır.
- ABŞ azərbaycanlılarını seçki prosesinə yaxından cəlb etmək üçün daha hansı addımlar atacaqsınız?
- Biz artıq ABŞ azərbaycanlılarını seçki prosesinə cəlb etməyə başlamışıq. Hal-hazırda seçkilərdə hansı namizədlərin Azərbaycan-Amerika münasibətlərinin inkişafına müsbət təsir göstərəcəyinə dair təhlillər aparırıq. Yaxın gələcəkdə USAN, Azərbaycan Amerika Şurası, Azərbaycan Amerika Cəmiyyəti tərəfindən keçiriləcək tədbirlərdə soydaşlarımızın maraqlarına səbəb olan suallar cavablandırılacaq. Sonda qeyd etmək istərdim ki, USAN Azərbaycan diaspor tarixində yeni bir addımdır və bu, yalnız başlanğıcdır. Tezliklə bu iş öz bəhrəsini verəcək.