Mədəniyyət siyasəti

Ana səhifə

Mədəniyyət siyasəti

Bəstəkarlar İttifaqı Fikrət Əmirovun anadan olmasının 90 illiyi ilə əlaqədar müsabiqə elan edib

17 fevral 2012 08:59 (UTC +04:00)

Bakı – APA. Azərbaycan Bəstəkarlar İttifaqı simfonik muğam janrının yaradıcısı Fikrət Əmirovun anadan olmasının 90 illiyi ilə əlaqədar gənc bəstəkarlar arasında simfonik əsərlərin (simfonik muğam janrına üstünlük veriləcək) yazılması üçün müsabiqə elan edib. İttifaqdan APA-ya verilən xəbərə görə, müsabiqəyə təqdim ediləcək əsərlər 10-12 dəqiqəlik vaxt həcmində olmalıdır.

Müsabiqədə 35 yaşına qədər bəstəkarlar iştirak edə bilər və onlar əsərlərinin partiturasını deviz yazılmış bağlı iri zərfdə təqdim etməlidirlər. Təqdim olunmuş işin səhifələrində müəllifin adı və soyadı yazılmamalıdır. Müəllif haqqında məlumatlar (ad, soyad, təhsil, ünvan, telefon) yalnız həmin deviz yazılmış kiçik zərfdə əlavə edilməlidir.

Təqdim olunmuş işlər 2012-ci il oktyabr ayının 15-nə qədər Azərbaycan Bəstəkarlar İttifaqında qəbul olunacaq.

Müsabiqədə qalib gəlmiş ən yaxşı simfonik partitura qalibinə 2000 manat məbləğində pul mükafatı təqdim ediləcək.