Digər xəbərlər

Digər xəbərlər

“Xocalı soyqırımı: milyon imza, bir tələb” kitabının təqdimat mərasimi keçirilib

19 fevral 2007 10:53 (UTC +04:00)

Azərbaycanda Vətəndaş Cəmiyyətinin İnkişafına Yardım Assosiasiyası (AVCİYA) bu gün “Xocalı soyqırımı: milyon imza, bir tələb” kitabının təqdimat mərasimini keçirib. APA-nın məlumatına görə, kitabla bağlı assosiasiyanın vitse-prezidenti Vəli Əlibəyov mərasim iştirakçılarını tanış edib. Onun sözlərinə görə, ötən il müddətində AVCİYA Xocalı soyqırımının tanınması ilə bağlı əhali arasında imzatoplama kampaniyası keçirib və bir milyon imza toplanılıb. İmzaların bir qismi sözügedən kitabda, tam şəkildə isə 16 kitabda toplanıb. V. Əlibəyov bildirib ki, kitab beynəlxalq təşkilatlara, dünya parlamentlərinə və kitabxanalarına təqdim olunacaq. Kitabda Xocalı soyqırımı zamanı qətlə yetirilmiş 423 nəfərin siyahısı verilib. Bundan əlavə, Xocalı faciəsi ilə bağlı beynəlxalq axtarışa verilmiş erməni hərbi canilərinin də siyahısı qeyd olunub. Mərasimdə assosiasiyanın beynəlxalq əlaqələr şöbəsinin rəhbəri Günel Əliyeva, beynəlxalq əlaqələr üzrə eksperti Müslüm Məmmədov, kitabın redaksiya heyətinin üzvü, şair Musa Yaqub kitabın hazırlanması prosesi ilə bağlı məlumat veriblər. AMEA-nın Tarix İnstitutunun direktoru, millət vəkili Yaqub Mahmudov Xocalı faciəsinin unudulmaması üçün bu tipli tədbirlərin davam etdirilməsinin vacib olduğunu qeyd edib: “Erməni tərəfi bizə qarşı total hücumlara keçirsə, biz də uyğun addımlar atmalıyıq”. O, həmçinin Ermənistan prezidenti Robert Köçəryanın beynəlxalq məhkəməyə verilməsi üçün hüquqşünasların lazımı sənədlər hazırlamasını təklif edib.
Politoloq Vəfa Quluzadə isə qeyd edib ki, ayrı-ayrı vətəndaşlara Ermənistan hökuməti tərəfindən kompensasiya ödənilməsi üçün hüquqi müstəvidə iş aparılmalıdır. O, həmçinin Avropa dövlətlərini Ermənistanın işğalçı olduğuna inandıracağımız halda da onların problemi həll etməyəcəklərini vurğulayıb: “Çünki həmin dövlətlərin Ermənistanla isti münasibətləri var və yalnız sülh yolunu təklif edirlər. Sülh yolu yalnız rəsmi imza atıb torpaqları Ermənistana verməkdir”. QAT sədri Akif Nağı da problemin yalnız hərb yolu ilə həllinin mümkün olduğunu qeyd edib. Onun sözlərinə görə, ermənilər içərisində dialoq aparılacaq normal insan yoxdur.
Toplantıda iştirak edən Xocalıdan olan millət vəkili Elman Məmmədov isə jurnalistlərlə söhbətində kitabda 423 nəfərin siyahısının verilməsinin düzgün olmadığını bildirib: “Xocalıda 613 nəfər insan qətlə yetirilib. Onların hamısının siyahısı verilməli idi. Ona görə də bu məsələ bəzi problemlər yarada bilər”. Tədbirdə iştirak edən Xocalı sakinləri də 423 nəfərlik siyahının verilməsinə etiraz ediblər. V. Əlibəyov isə bildirib ki, sözügedən siyahıya Xocalı soyqırımı zamanı qətlə yetirilən, itkin düşən, girov götürülən uşaq və yeniyetmələr, qadın, qız və qocaların adları daxil edilib: “Kitabda hərbçilərin adları göstərilməyib, yalnız dinc sakinlərin adları salınıb. Ona görə də 423 nəfərlik siyahı yaranıb”. /APA/