Digər xəbərlər

Ana səhifə

Digər xəbərlər

Nizami Bəhmənov: “Erməni deputatlar bəyanat qəbul etməklə Azərbaycan torpaqlarını işğal etdiklərini təsdiqləyiblər”

30 aprel 2008 13:09 (UTC +04:00)

Bunu APA-ya “Dağlıq Qarabağın azərbaycanlı icması” İctimai Birliyinin sədri Nizami Bəhmənov Ermənistan parlamentinin Dağlıq Qarabağ münaqişəsinin nizamlanması ilə bağlı bəyanat qəbul etməsinə münasibət bildirərkən deyib. N. Bəhmənovun sözlərinə görə, ermənilər Azərbaycanın müharibə əhval-ruhiyyəsində olduğunu, gec-tez işğal altında olan torpaqları hərbi yolla azad edəcəyini bildiklərindən, özlərini sığortalamaq, beynəlxalq ictimaiyyətə sülhpərvər dövlət kimi görünmək məqsədilə belə bir bəyanat qəbul ediblər: “Bəyanatda bildirilir ki, guya Ermənistan hökuməti və Silahlı Qüvvələri Dağlıq Qarabağdakı bir qrup separatçının təhlükəsizliyinin təminatçısıdır”. N. Bəhmənov bu sənədin qəbul edilməsində Ermənistandakı daxili vəziyyətin də təsiri olduğunu söyləyib: “Ermənistanda vəziyyət o qədər gərgindir ki, əhval-ruhiyyəni, əhalinin, ictimai birliklərin, siyasi partiyaların fikrini müharibəyə yönəltmək məqsədi güdən bir bəyanat qəbul olunub. Bu bəyanatı qəbul etməklə onlar işğalçı siyasətlərini daha da intensivləşdirdiklərini, heç bir konstruktiv danışıqlara getmək istəmədiklərini göstərirlər”.