Xarici siyasət

Bakı-APA. Martın 27-də Azərbaycanın BMT və digər beynəlxalq təşkilatlar yanında Daimi Nümayəndəliyi tərəfindən BMT-nin Cenevrə şəhərindəki Baş Qərargahında “Beynəlxalq Novruz Günü” tədbiri və Azərbaycan Mədəniyyət Gecəsi təşkil edilib. Azərbaycanın BMT və digər beynəlxalq təşkilatlar yanında Daimi Nümayəndəliyindən APA-ya verilən xəbərə görə, martın 27-də BMT-nin Cenevrə şəhərindəki bölməsinin Baş Qərargahında Azərbaycan, Əfqanıstan, İran, Qazaxıstan, Qırğızıstan, Özbəkistan, Tacikistan, Türkmənistan və Türkiyə Daimi Nümayəndəliklərinin təşkilatçılığı ilə “Beynəlxalq Novruz Günü” adlı tədbir keçirilib.

Azərbaycan Respublikasının təşəbbüsü ilə irəli sürülmüş və BMT Baş Assambleyası tərəfindən qəbul olunmuş “Beynəlxalq Novruz Günü” adlı qətnaməyə müvafiq olaraq, “Beynəlxalq Novruz Günü” tədbiri BMT-nin Cenevrə şəhərindəki Baş Qərargahında – Millətlər Sarayında hər il ənənəvi olaraq, BMT-nin Cenevrə bölməsi ilə birlikdə təşkil olunur. 2013-cü ildə Azərbaycanın BMT-nin Cenevrə şəhərindəki bölməsi və digər beynəlxalq təşkilatlar yanında Daimi Nümayəndəliyi tədbirin keçirilməsində əsas təşkilatçı qismində çıxış edib.

Tədbirin açılış mərasimində Azərbaycanın mədəniyyət və turizm nazirinin müavini xanım S.Məmmədəliyeva və BMT-nin Cenevrə bölməsinin rəhbəri K.Tokayev çıxış edərək, Novruz bayramının adət və ənənələrinin dünya mədəni irsinin mühüm tərkib hissəsi olduğunu, dünya mədəniyyəti və incəsənətinə xüsusi töhfə verdiyini qeyd etmiş və tədbirin təşkilində iştirak etmiş 9 ölkənin Daimi Nümayəndəliklərinin bu addımını mədəni əməkdaşlığın nümunəsi qismində səciyyələndiriblər. Tədbirdə, həmçinin, BMT-nin Cenevrə bölməsinin kitabxanasının rəhbəri və mədəniyyət komitəsinin sədri D.Çikvaidze, BMT Katibliyi, beynəlxalq təşkilatların əməkdaşları, diplomatik korpusun üzvləri, Cenevrə şəhərinin rəsmiləri, KİV nümayəndələri və diasporamızın nümayəndələri iştirak ediblər.

“Beynəlxalq Novruz Günü” tədbiri çərçivəsində Azərbaycan Respublikasının Daimi Nümayəndəliyi tərəfindən Azərbaycanın tarixi, mədəniyyəti və incəsənətinə dair foto və video sərgi, milli yeməklərdən ibarət xüsusi guşə təşkil edilib, “Bakı” və “İrs” jurnallarının nüsxələri və digər materiallar təqdim edilib, həmçinin Azərbaycandan dəvət edilmiş milli musiqi instrumental ansamblının ifasında Azərbaycan xalq mahnıları və muğam sədaları səsləndirilib. Tədbir iştirakçıları Novruz bayramı münasibətilə Azərbaycan Respublikasının Daimi Nümayəndəliyi tərəfindən xonçalarda təqdim edilmiş şirniyyat və milli mətbəx nümunələri - Novruz bayramında süfrələrin bəzəyi olan paxlava, şəkərbura və ölkəmizin tarixi, mədəniyyəti və incəsənəti ilə bağlı müxtəlif materiallardan ibarət sərgiyə xüsusi maraq nümayiş etdirib. Qonaqlar ölkəmizdə Novruz bayramının qeyd edilməsinin özəllikləri ilə maraqlanıb, tariximizin, mədəniyyətimizin, mətbəximizin və incəsənətimizin zənginliyinə, habelə xalqımızın qonaqpərvərliyinə olan heyranlıqlarını ifadə edib.

Həmin gün BMT-nin Cenevrə bölməsinin Baş Qərargahında Azərbaycan Respublikasının Daimi Nümayəndəliyi tərəfindən “Azərbaycan Mədəniyyət Gecəsi” adlı tədbir təşkil olunub. Mədəniyyət Gecəsinin açılış mərasimində Azərbaycanın mədəniyyət və turizm nazirinin müavini S.Məmmədəliyeva və BMT-nin Cenevrə bölməsinin rəhbəri K.Tokayev çıxış edib. Natiqlər çıxışlarında Azərbaycan mədəniyyətinin dünya mədəni irsinə verdiyi töhfələrdən bəhs edib və bu xüsusda, təşkil edilmiş bu mədəniyyət gecəsinin BMT-nin Cenevrə bölməsində mövcud olan mədəni müxtəliflik və zənginlik ruhuna əlavə dəyər qatdığını bildirib. K.Tokayev, öz çıxışında, həmçinin, “Beynəlxalq Novruz Günü” və Azərbaycan Mədəniyyət Gecəsinin təşkilinə görə Azərbaycan Respublikasının BMT-nin Cenevrə şəhərindəki bölməsi və digər beynəlxalq təşkilatlar yanında Daimi Nümayəndəliyinə və bilavasitə səfir, daimi nümayəndə M.Nəcəfbəyliyə öz dərin minnətdarlığını ifadə edib.

Azərbaycan Mədəniyyət Gecəsi çərçivəsində ölkəmizin musiqiçilərinin ifasında Azərbaycan muğamından parçalar, milli musiqi əsərləri və xalq mahnılarından ibarət möhtəşəm konsert proqramı keçirilib. Tədbirin sonunda Azərbaycan Respublikasının Daimi Nümayəndəliyi tərəfindən rəsmi ziyafət təşkil edilmişdir .