Bakı Ali Neft Məktəbində (BANM) Amerika Yoxlama və Materiallar Cəmiyyəti (ASTM) və Amerika Neft İnstitutu (API) ilə birlikdə Azərbaycanın texniki yönümlü universitetləri üçün seminar keçirilib.
BANM-in ictimaiyyətlə əlaqələr şöbəsindən APA-ya bildirilib ki, tədbirdə Azərbaycanın ondan artıq ali təhsil müəssisəsi – Bakı Ali Neft Məktəbi, Bakı Dövlət Universiteti, Azərbaycan Dövlət Neft və Sənaye Universiteti, Azərbaycan Dövlət Dəniz Akademiyası, ADA Universiteti, Azərbaycan Memarlıq və İnşaat Universiteti, Azərbaycan Texniki Universiteti, Xəzər Universiteti, Qafqaz Universiteti, Azərbaycan Texnologiya Universiteti və Sumqayıt Dövlət Universiteti təmsil olunub.
BANM-ın rektoru Elmar Qasımov seminarın Azərbaycan universitetlərində tədris prosesinin effektiv təşkil olunması məqsədilə testlə bağlı vahid standartların və normaların hazırlanması və tətbiq olunmasında əhəmiyyətli olduğunu deyib.
ASTM-ın satış və marketinq üzrə vitse-prezidentinin köməkçisi Ceyms Tomas hesabatla çıxış edərək ASTM tərəfindən tətbiq olunan standartlardan və test metodlarından, onlayn tədris proqramlarından və elektron kitabxanaların təşkil olunmasından danışıb.
Neft-qaz sənayesində, eləcə də tədris proqramlarında və fərdi sertifikatlaşdırma proqramlarında istifadə olunan APİ standartları haqqında API-ın qlobal sənaye xidmətləri üzrə direktoru xanım Lakşmi Mahon məlumat verib.
Seminarda ASTM-ın mikro informasiyaların idarə olunması və paylanma xidmətləri üzrə icraçı direktoru Mehmet Haseki və ASTM-ın proseslər üzrə meneceri Arseniy Korniliev iştirak ediblər.
Qeyd edək ki, ASTM materiallar, məhsul, sistem və xidmətlər üçün standartlar hazırlayan beynəlxalq Amerikan təşkilatıdır. Amerikanın Neft İnstitutu (APİ) ABŞ-ın bütün aspektləri araşdıran və neft-qaz sənayesində məsələlərin həlli ilə bağlı fəaliyyətini təmin edən yeganə qeyri hökumət təşkilatıdır. ASTM və API neft-qaz sənayesi üzrə sənədləşmə üçün müəyyən standartların hazırlanmasında əməkdaşlıq edir.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
