Bakı. Real Cəfərli – APA. “İranda bu il iyunun 14-də keçiriləcək prezident seçkilərinin nəticələri bu ölkə rəhbərliyinin nüvə ambisiyasını dəyişdirməyəcək”.
APA-nın “Radiofərda”ya istinadən məlumatına görə, bunu ABŞ dövlət katibi Con Kerri deyib.
Onun sözlərinə görə, İranın nüvə proqramı haqda seçkilərdə qələbə qazanmış şəxs qərar vermir: “Bu məsələdə son söz İranın ali dini lideri, ayətullah Əli Xamneyiyə məxsusdur”.
C. Kerri deyib ki, ABŞ İranın nüvə proqramı ətrafında yaranmış gərginliyi diplomatik yolla həllinə səy göstərməkdə davam edəcək: “Amma zaman da getdikcə daralır”.
ABŞ dövlət katibi vurğulayıb ki, İranın nüvə proqramının sülh məqsədli olub-olmamasını sübut etməməsi dünya ictimaiyyətinin ciddi narahatlığına gətirib çıxarır.