Bakı. Könül Kamilqızı - APA. Son 30-40 il ərzində ilk dəfə olaraq Təhsil Nazirliyi region peşə məktəbləri üçün kənd təsərrüfatı texnikası alacaq.
APA-nın xəbərinə görə, bu barədə jurnalistlərə məlumat verən Təhsil Nazirliyinin İnformasiya şöbəsinin müdir müavini, sektor müdiri Cəsarət Valehov bildirib ki, kənd təsərrüfatı texnikası peşə təhsili müəssisələrinə sonuncu dəfə 1988-ci ildə verilib.
Onun sözlərinə görə, gələn il Təhsil Nazirliyi ilk dəfə olaraq region peşə məktəbləri üçün 10 ədəd kombayn, traktor və müxtəlif kənd təsərrüfatı texnikası alacaq: “Peşə məktəblərində təhsil alanlar artıq praktiki olaraq vərdişlərə yiyələnə biləcək, ən yeni texnologiya ilə təmasda olacaqlar”.
C.Valehov qeyd edib ki, peşə liseyləri ilə bağlı digər yeni layihələr də olacaq: “Gələn il “Müasir Azərbaycan Peşəkarları Layihəsi” çərçivəsində və Azərbaycan Respublikasında Təhsilin inkişafı üzrə Dövlət Strategiyasında nəzərdə tutulduğu kimi yeni peşə mərkəzləri yaradılacaq. Bakıdakı 6 saylı peşə məktəbində nəqliyyat sektoru üzrə kadrlar hazırlanması nəzərdə tutulub. Bundan başqa, Qəbələdə aqrar sahə üzrə yeni peşə məktəbi fəaliyyətə başlayacaq”.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
