Sosial

Ana səhifə

Sosial

Bakıda Beynəlxalq Hemofiliya Günü ilə bağlı tədbir keçirilib

16 aprel 2013 09:23 (UTC +04:00)

Bakı. Ramil Məmmədli - APA. Ailə, Qadın və Uşaq Problemləri üzrə Dövlət Komitəsi Hemofiliyalı Xəstələrin Respublika Assosiasiyası (HXRA) ilə birgə hemofiliyalı uşaqlar və onların ailə üzvlərinin iştirakı ilə tədbir keçirib.

APA-nın məlumatına görə, tədbirdə bildirilib ki, aprelin 17-si dünyanın 121 ölkəsində Beynəlxalq Hemofiliya Günü kimi qeyd edilir. Azərbaycanda da bu günün qeyd edilməsi artıq ənənə halını alıb.

Sonra Azərbaycanda hemofiliya problemi və bu sahədə aparılan işlər haqqında Dünya Hemofiliya Federasiyası tərəfindən çəkilmiş 4 dəqiqəlik film nümayiş olunub.

HXRA-nın prezidenti Gülnarə Hüseynova deyib ki, hazırda hemofiliyadan dünyada təxminən 400 min nəfər əziyyət çəkir. G.Hüseynova əlavə edib ki, bu xəstəlik insan qanında laxtalanma faktorlarının çatışmazlığı nəticəsində əmələ gəlir. Xəstəlik anadan əsasən oğlan uşaqlarına irsən ötürülür. Hemofiliyalı xəstələr mütəmadi olaraq laxtalanma faktorları qəbul etmədikdə, dəfələrlə baş verən şiddətli qanaxmalar, oynaqlara və yumşaq toxumalara qansızmalar onların uşaq və gənc yaşlarında şikəst olmasına, bəzi hallarda isə ölümünə səbəb olur.

Hemofiliyalı xəstələrə xidmətin daha da yüksəldilməsi məqsədilə dövlətin atdığı addımlardan da danışan assosiasiya prezidenti qeyd edib ki, artıq dövlət bu xəstələrin dərmanla təminatı istiqamətində bütün işləri görür.

Respublika Elmi-Praktik Hemofiliya Mərkəzinin (REPHM) rəhbəri Elmira Qədimova bildirib ki, 1973-cü ildən Mirqasımov adına Respublika Klinik Xəstəxanasının nəzdində yaradılmış Elmi-Praktik Hemofiliya Mərkəzində həmin xəstələr müayinə və müalicə olunurlar: ”2006-cı ilə qədər hemofiliyalı xəstələrin müalicəsində yalnız qan və dondurulmuş plazmadan istifadə olunurdu. Artıq “Hemofiliya və talassemiya irsi qan xəstəlikləri üzrə Dövlət Proqramı”na uyğun olaraq faktor preparatları Səhiyyə Nazirliyi tərəfindən mütəmadi olaraq xaricdən ölkəmizə gətirilir və mərkəz onlarla tam təmin olunur. Həmin dərmanlar Elmi-Praktik Mərkəzin həkimləri tərəfindən xəstələrə tamamilə pulsuz, dövlət hesabına verilir. Amma bu xəstələrə qan çox lazımdır. Ona görə də bu gün donorlara çox ehtiyacımız var”. E.Qədimova xəstələrə ilk yardımın valideynlərinin göstərməli olduqlarını xatırladıb.

Ailə, Qadın və Uşaq Problemləri üzrə Dövlət Komitəsinin şöbə müdiri Cəmilə Bağırova, Azərbaycan Respublikası Əlil Təşkilatları İttifaqının sədri Davud Rəhimov, Ombudsman Aparatının sektor müdiri Yeganə Cəfərova və digər qurumların nümayəndələri çıxış edərək, bu sağalmaz xəstəliklə mübarizə, xəstələrin cəmiyyətə inteqrasiyası haqda danışıblar.

Tədbirdə hemofiliyalı uşaqlar və onların ailə üzvləri üçün hemofiliya xəstəliyi haqqında tamaşa göstərilib, həmçinin, Ailə, Qadın və Uşaq problemləri üzrə Dövlət Komitəsinin uşaqlar üçün təşkil etdiyi möhtəşəm “Sabun Köpükləri” tamaşası nümayiş olunub.

Sonda isə uşaqlar dəniz kənarına çıxaraq üzərində "Hemofiliya - imkanlarımızı yaxşılaşdıraq!" yazılmış hava balonunu səmaya buraxıblar.