Bakı. Məlahət Nəcəfova - APA. Rumıniyanın Azərbaycandakı səfirliyində NATO-nun Azərbaycandakı rezident-əlaqələndiricisi qismində “NATO-Azərbaycan tərəfdaşlığının hazırki durumu və perspektivləri” mövzusunda dəyirmi masa keçirilib.
Səfirlikdən APA-ya verilən məlumata görə, tədbirdə NATO-ya üzv ölkələrin Azərbaycandakı səfirləri, hərbi attaşeləri, NATO-nun Cənubi Qafqaz üzrə ofisinin nümayəndələri iştirak edib.
Dəyirmi masanı açan Rumıniyanın Azərbaycandakı səfiri Kristian Çiobanu NATO-Azərbaycan tərəfdaşlığının vacibliyini vurğulayaraq bildirib ki, ötən dövr ərzində Azərbaycanda bir sıra tədbirlər keçirilib: “14-18 sentyabr tarixlərində NATO-nun Niderlandın Brunssum şəhərində olan Birgə Komandanlığı tərəfindən Bakıda "Psixoloji əməliyyatlar üzrə (PSYOPS) mobil təlim qrupu" tədbiri təşkil edilib. Sentyabrın 19-da Bakıda “Avropa şəhərciyi" təşkil olunub. Oktyabrın 7-də isə Azərbaycanda NATO günləri başlayıb. Sabah Rumıniya səfirliyi Azərbaycan Tələbə Gənclər Təşkilatı ilə birlikdə NATO-Azərbaycan əlaqələrinə dair görüş təşkil edəcək”.
Rumıniya səfiri Azərbaycanın gənc nəsli arasında NATO dəyərlərinə marağın artdığını qeyd edib və bunun əlaqələrin gələcəkdə dərinləşməsi üçün möhkəm zəmin yaratdığını söyləyib: “Rumıniyanın diplomatik missiyası NATO-Azərbaycan əlaqələrini daha da irəlilətmək üçün ictimai diplomatiya tədbirlərini təşkil etməkdə davam edəcək. Bakı enerji təhlükəsizliyi baxımından əhəmiyyət kəsb edən bölgədə NATO üçün güclü və etibarlı tərəfdaşdır”.
Tədbirdə NATO-nun Cənubi Qafqaz ofisinin siyasi müşaviri Jiri Preklik NATO-nun Azərbaycanla bağlı siyasətindəki yeniliklər barədə məlumat verib.
NATO-nun Cənubi Qafqaz üzrə ofisinin hərbi müşaviri Maksimilian Eder NATO-Azərbaycan əlaqələrinin təhlükəsizlik sahəsindəki əməkdaşlığının əsas elementlərini təqdim edib.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
