Bakı. Rəşad Süleymanov – APA. Azərbaycan Müdafiə Nazirliyi MDB ölkələri Baş Qərargah rəisləri Komitəsinin aprelin 7-8-də Bakıda keçiriləcək iclasında Ermənistan nümayəndəsinin iştirakı ilə bağlı məsələyə münasibət bildirib.
Müdafiə Nazirliyinin mətbuat xidmətindən APA-ya bildirilib ki, MDB ölkələri Baş Qərargah rəisləri Komitəsinin Bakı şəhərində ilk dəfə keçiriləcək iclasında iştirakçıların siyahısı tam müəyyənləşdirilməyib: «Siyahı tam müəyyən olunmadığından Ermənistan Silahlı Qüvvələrinin nümayəndəsinin iclasda iştirak edib-etməyəcəyi tam bəlli deyil».
Qeyd edək ki, Azərbaycan Müdafiə Nazirliyi bu gün MDB ölkələri Baş Qərargah rəisləri Komitəsinin aprelin 7-8-də Bakıda iclasının keçiriləcəyi barədə məlumat yaydıqdan sonra Ermənistan Müdafiə Nazirliyinin mətbuat xidmətinin rəhbəri tədbirə bu ölkənin Baş Qərargah rəisinin, daha sonra isə Ermənistanın Moskvadakı hərbi nümayəndəsinin qatılacağını bəyan edib.
Azərbaycan Müdafiə Nazirliyi: Ermənistan Silahlı Qüvvələrinin nümayəndəsinin Bakıdakı iclasda iştirak edib-etməyəcəyi tam bəlli deyil
25 mart 2014 11:31 (UTC +04:00)