Bakı - APA. Dialoq və Əməkdaşlıq uğrunda İslam Konfransı Gənclər Forumunun Mədəniyyətlərarası Dialoq üzrə baş koordinatoru Leyla Əliyevanın təşəbbüsü ilə həyata keçirilən “Xocalıya Ədalət” beynəlxalq məlumatlandırma kampaniyası çərçivəsində Azərbaycanın Litvadakı səfirliyi Avropa Azərbaycan Cəmiyyətinin (TEAS) dəstəyi ilə Vilnüs şəhər Sarayında (Ratuşada) Xocalı soyqırımının 23-cü ildönümü ilə bağlı “Həyat üçün qan” adlı anım mərasimi keçirib.
Səfirlikdən APA-ya verilən məlumata görə, tədbirdə Litva Seymində Azərbaycanla parlamentlərarası əlaqələr qrupunun sədri Yuras Pojela, GUAM-a üzv ölkələrin ərazi bütövlüyü üzrə qrupun rəhbəri Mantas Adomenas və Seymin deputatları, Litva Olimpiya Komitəsinin prezidenti və bir sıra nazirliklərin vəzifəli şəxsləri, QHT rəhbərləri, Litvanın ictimai-siyasi xadimləri, şou-biznes və yerli KİV nümayəndələri, Litva Azərbaycanlı Gənclər Təşkilatının (AYOL) üzvləri, Litvada yaşayan soydaşlarımız və təhsil alan tələbələrimiz iştirak ediblər.
Tədbiri giriş nitqi ilə açan səfir Həsən Məmmədzadə Xocalı soyqırımı haqqında qonaqlara ətraflı məlumat verərək, soyqırımın tək azərbaycanlılara deyil, bütün bəşəriyyətə qarşı törədilmiş ağır cinayət olduğunu bildirib. O, həmin gün yüzlərlə dinc azərbaycanlı əhalinin yalnız milli mənsubiyyətinə görə məhv edildiyini və bu dəhşətli faciənin Azərbaycan xalqının qan yaddaşında əbədi həkk olunduğunu qeyd edib. Səfir anım mərasimi çərçivəsində Xocalı qurbanlarının xatirəsinin yad edilməsi məqsədilə səfirlik tərəfindən qan vermə aksiyasının təşkil edildiyini iştirakçıların diqqətinə çatdıraraq, hamını bu aksiyaya qoşulmağa çağırıb.
Litva Seymində Azərbaycanla parlamentlərarası əlaqələr qrupunun sədri Yuras Pojela öz çıxışında Ermənistan-Azərbaycan münaqişəsinin ağır nəticələri barədə danışaraq Azərbaycanın 20 faiz ərazisinin işğal edildiyini, bir milyondan artıq insanın doğma yurdlarından didərgin düşdüyünü qeyd edib. Y.Pojela 23 üç il öncə dünya ictimaiyyətinin gözü qarşısında erməni millətçiləri tərəfindən bəşəriyyətə qarşı cinayət törədildiyini bildirərək, dünya ictimaiyyəti tərəfindən bu qətliama siyasi-hüquqi qiymətin verilməsinin və cinayətkarların cəzalandırılmasının vacibliyini vurğulayıb. O, bu günlərdə Xocalı soyqırımı ilə əlaqədar Litva Seyminin 51 üzvünün müraciət qəbul etdiyini qeyd edərək, Aİ-ni Ukrayna məsələsində nümayiş etdirdiyi həssaslığı eyniliklə Dağlıq Qarabağ məsələsinin həllində də göstərməyə çağırıb.
Hərbi jurnalist Ricardas Lapaytis 1992-1993-cü illərdə dəfələrlə Azərbaycana səfər etdiyini, ermənilər tərəfindən Laçında, Ağdamda və digər rayonlarda törədilmiş qanlı hadisələrin canlı şahidi olduğunu qeyd edərək, Xocalı qətliamının acı nəticələrinin şəkillərini çəkdiyini söyləyib. O, Xocalı faciəsi haqqında Litvada yazan ilk jurnalist olduğunu, “Sonsuz dəhliz” sənədli filminin çəkilişində iştirak etdiyini bildirib.
Daha sonra mərasim iştirakçılarına Litvalı rejissor Aleksandras Brokas və Mindaugas Urbonaviçusun çəkdiyi “Sonsuz dəhliz” sənədli filmi nümayiş olunub.
Tədbir çərçivəsində səfirliyin əməkdaşları, Litvada təhsil alan tələbələrimiz və daimi yaşayan soydaşlarımız Xocalı soyqırımının qurbanlarının xatirəsinə Litvada qan azlığından əziyyət çəkən insanlar üçün qan veriblər.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
