On rayonda diri mal satışına qadağa qoyulub
Bakı. Gülnar Bəşirova- APA. ““Nodulyar dermatit” virus xəstəliyinin müşahidə olunduğu vaxtdan indiyədək 11 baş iribuynuzlu heyvanın tələf olması qeydə alınıb”.
APA-nın məlumatına görə, bunu Dövlət Baytarlıq Xidmətinin (DBX) rəisi Siyalə Rüstəmova deyib.
O bildirib ki, tələfat bu xəstəlikdən yox, yanaşı gedən, o cümlədən qan-parazitar və digər xəstəliklərdən baş verib: “Xəstəlik Biləsuvar, Ucar, Cəlilabad, Ağdaş, daha sonra isə Bərdə, Samux, Zərdab və digər rayonlarda saxlanılan heyvanlar arasında müşahidə olunmaqdadır. Xəstəlik müşahidə edilən heyvanlar arasında simptomatik müalicə tədbirləri aparılır. Aparılan müalicə öz effektini verməkdədir. Artıq 10 rayonun mal bazarında diri mal satışına qadağa qoyulub”.
O qeyd edib ki, təsərrüfatlarda mütəmadi olaraq profilaktiki baytarlıq-sanitariya tədbirləri keçirilir: “Təəssüflər olsun ki, xəstəliyin yayılma arealında və rayonların sayında da artım müşahidə olunmaqdadır. Xəstəlik ilk vaxtlar 4 rayonda müşahidə edilsə də, hazırda onların sayı 10-a çatıb. Bu artıma havaların kəskin istiləşməsi nəticəsində virus daşıyan qansoran həşəratların aktivliyi, çoxalması, heyvanların nəzarətsiz hərəkəti, təsərrüfatlarda baytarlıq-sanitariya tələblərinə düzgün əməl edilməməsi və digər amillər səbəb olub”.
Qeyd edək ki, bir müddət öncə İraq, Türkiyə və İran ərazilərində qeydə alınan, iribuynuzlu heyvanlar arasında yayılan “Nodulyar dermatit” virus xəstəliyi Azərbaycanda da müşahidə olunmaqdadır. Bu xəstəlik virus mənşəli olmaqla iribuynuzlu heyvanlarda qısa müddətli isitmə, dəri örtüyünün, limfa sisteminin, selikli qişanın zədələnməsi, dərialtı toxumalarda düyünlərin və nekrozların əmələ gəlməsi ilə səciyyələnir. Xəstəlik heyvandarlıq məhsullarının, o cümlədən süd və ət məhsullarının azalması, gön-dəri məmulatının keyfiyyətinin aşağı düşməsinə səbəb olur.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
