Futbol

Ana səhifə

Futbol

“Barselona” İspaniya Kubokunda “Real”ı mübarizədən kənarlaşdırıb

26 yanvar 2012 07:47 (UTC +04:00)

Bakı-APA. Dünya futbol ictimaiyyətinin diqqət mərkəzində olan növbəti “El Klassiko” keçirilib. Apasport.az saytının məlumatına görə, “Barselona” yenə “Real”dan üstün olduğunu nümayiş etdirib.

İspaniya kubokunun 1/4 final mərhələsinin “Nou Kamp”da keçirilən cavab oyununda oyun 2:2 hesabı ilə nəticələnsə də, “Barselona”nın Madriddə qazandığı qələbə (2:1) onları yarımfinala yüksəldib. Bununla da “Real” 2-ci mövsümdür baş məşqçi Joze Mourinyonun rəhbərliyi altında qazandığı yeganə titulu qoruya, qalibi olduğu ölkə kubokunda mübarizəni davam etdirə bilməyib.

Oyuna daha yaxşı başlayan “Real” bir neçə qol imkanını qaçırmağının cəzasını ilk hissənin sonunda çəkib. Belə ki, Pedro Rodriges 42-ci dəqiqədə Lionel Messinin gözəl reydindən sonra aldığı ötürməni tora qovuşdurub. İlk hissənin 2-ci uzatma dəqiqəsində isə Dani Alveşin möhtəşəm qola imza ataraq, topu “doqquzluğ”a göndərib.

Demək olar hamı cütün taleyini həll olunduğunu düşündüyü halda, fasilədən sonra azarkeşlər gərgin mübarizənin şahidi olub. “Real”ın müdafiəçisi Serxio Ramos 55-ci dəqiqədə qol vursa da, baş hakim qayda pozuntusuna görə onu hesaba almayıb. Ruhdan düşməyən madridlilər 4 dəqiqəyə hesabı bərabərləşdirə biliblər. 68-ci dəqiqədə Kriştianu Ronaldo, 72-ci dəqiqədə sonradan meydana çıxan fransalı hücumçu Kərim Benzema qol vurub. Ancaq “Real” qələbə topunu vura bilməyib və üstəlik, kobud keçən, çoxsaylı sarı vərəqələrin olduğu matçı azlıqda bitirib. Belə ki, Ramos 89-cu dəqiqədə 2-ci sarı vərəqə alaraq, meydandan qovulub.

“Barselona”nın yarımfinalda rəqibi bu gün müəyyənləşəcək. Bu, böyük ehtimalla ilk oyunda evdə “Levante”yə 4:1 hesabı ilə qalib gələn “Valensiya” olacaq. Digər yarımfinalda isə “Mirandes” ilə “Atletik” qarşılaşacaq.