Bakı – APA. AFFA-nın İntizam Komitəsinin iclası keçirilib. Apasport.az saytının məlumatına görə, yığıncaqda FİFA-nın assosiasiyaya göndərdiyi məktuba baxılıb.
Bu sənəddə beynəlxalq futbol təşkilatının Nizam-İntizam Komitəsinin “Bakı” klubu haqqında qərar qəbul etdiyi bildirilib.
Belə ki, “Bakı” hollandiyalı futbolçusu Adnan Bərəkətlə arasında bağlanmış müqavilə şərtlərinə riayət etməməyi səbəbindən kluba cəza verilib. FİFA AFFA-nın İntizam Komitəsinə paytaxt təmsilçisinin hesabından 6 xal silinməsini tapşırıb.
Bunları nəzərə alan komitə Azərbaycan çempionatının I divizionunda çıxış edən "Bakı"nın cari mövsümdəki hesabından 6 xal silib.