Futbol

Ana səhifə

Futbol

Sabah futbol üzrə Avropa çempionatının seçmə mərhələsinin püşkü atılacaq

04 fevral 2015 09:30 (UTC +04:00)

Bakı – APA. Sabah 21 yaşadək futbolçular arasında Avropa çempionatının seçmə mərhələsinin püşkü atılacaq. Apasport.az saytının məlumatına görə, 2017-ci ildə Polşada baş tutacaq yarışa 12 vəsiqədən birini qazanmaq arzusunda olan Azərbaycan yığması tarixində 11-ci dəfə final mərhələsinə çıxmaq üçün mübarizəyə başlayacaq.

İlk dəfə AVRO-1996-nın seçmə mərhələsinə qatılan, ardınca baş tutan yarışa qatılmayan millimiz 9 dəfə seçmə qrup mərhələsində oynayıbsa, 1 dəfə qrupa düşmək uğrunda qarşılaşmalardan başıaşağı ayrılıb.

Seçmə mərhələdə 82 matç keçirən komandamız 9 qələbə qazanıb, 13 heç-heçə edib, 60 dəfə uduzub. Futbolçularımız 44 qol vurub, 191-ni buraxıb.

Turnir	O	Q	H	M	T	X	Yer
AÇ-1996	10	1	0	9	5-36	3	6-cı
AÇ-1998	-	-	-	-	-	-	-
AÇ-2000	8	1	1	6	5-20	4	5-ci
AÇ-2002	10	2	3	5	4-17	9	5-cı
AÇ-2004	8	0	0	8	0-22*	0	5-ci
AÇ-2006	10	0	3	7	1-17	3	6-cı
AÇ-2007	2	0	0	2	0-6*	0	-
AÇ-2009	10	0	3	7	6-21	3	6-ci
AÇ-2011	8	1	1	6	8-19	4	5-ci
AÇ-2013	8	2	1	5	6-18	7	4-cü
AÇ-2015	8	2	1	5	9-15	7	4-cü
	82	9	13	60	44-191	40

* - texniki nəticə top fərqində nəzərə alınmayıb.

Bakı vaxtı ilə 12:00-da başlayacaq püşkatma mərasimində qitənin 52 komandası iştirak edəcək. Meydan sahibi Polşa, həmçinin yarışa qatılmayan Cəbəllütariq istisna olmaqla, seçmə mərhələdə oynayacaq yığmalar 6 səbətə bölünüb. Onlar püşkdə 7-də 6, 2-də 5 komanda olmaqla 9 qrup formalaşdıracaq. Qaydalara əsasən, Azərbaycan yığması Ermənistan, Rusiya isə Ukrayna ilə qarşılaşa bilməz.

A səbəti: İspaniya, İngiltərə, İtaliya, Almaniya, Fransa, Çex Respublikası, Portuqaliya, Niderland, Danimarka

B səbəti: Rusiya, İsveçrə, İsveç, Serbiya, İsrail, Ukrayna, Slovakiya, Rumıniya, Belçika

C səbəti: Türkiyə, Sloveniya, Avstriya, Şotlandiya, Yunanıstan, Xorvatiya, Norveç, Ermənistan, Monteneqro

D səbəti: Finlandiya, Uels, Macarıstan, İslandiya, Bosniya və Herseqovina, Gürcüstan, Moldova, İrlandiya, Belarus

E səbəti: Bolqarıstan, Kipr, Makedoniya, Litva, Azərbaycan, Qazaxıstan, Albaniya, Latviya, Estoniya

F səbəti: Farer adaları, Şimali İrlandiya, Lüksemburq, Malta, San-Marino, Andorra, Lixtenşteyn

Qeyd edək ki, seçmə mərhələ martın 23-də start götürəcək.

Seçmə mərhələdə qrup qalibi olan 9 komanda Polşadakı final mərhələsinə vəsiqə qazanır. İkinci yeri tutanlar arasında ən yaxşı göstəriciyə malik 4 komanda isə pley-offda daha iki vəsiqə uğrunda mübarizə aparacaq.