Hadisə

Ana səhifə

Hadisə

Kürdəmirdə etiraz aksiyası keçirilib

29 noyabr 2008 15:14 (UTC +04:00)

APA-nın hadisə yerində olan yerli müxbirinin xəbərinə görə, Kürdəmirin 250-ə yaxın sakini Bakı prospektinə toplaşaraq müvafiq qurumlardan öz problemlərinin həllini tələb ediblər.

Etiraz edənlər rayon icra hakimiyyətinin, qaz istismar və su-kanalizasiya idarələrinin rəhbərlərinə ünvanladıqları şikayətləri dilə gətiriblər. Şikayətçilər deyiblər ki, Kürdəmir şəhərinin cənub hissəsindəki bir neçə küçə və rayon mərkəzinə birləşik Xırdapay kəndində əhali 16 ildir ki, təbii qazdan istifadə etmir: “ İki il öncə ərazidəki qaz xətləri əhalinin vəsaiti hesabına tam bərpa edilib, sayğaclar quraşdırılıb və abonentlərə yalnız 15 gün təbii qaz verilib”.

Əhali təbii qazla yanaşı içməli su və antisanitariya ilə bağlı şikayətini də bildirib. Xırdapay kəndinin sakinləri deyiblər ki, onlar uzun illərdir ki, çirkab sularından məişətdə istifadə etməyə məcbur olublar. Belə ki, Kürdəmir şəhərinin magistral kanalizasiya xəttindən sızan çirkab suları bu kəndin əhalisini içməli su ilə təmin edən su anbarına tökülür və bu da mədə-bağırsaq xəstəliklərinin yaranmasına səbəb olur. Üstü açıq kanalizasiya xətti həmin su anbarının yanından keçir. Anbarın suyu son bir ildə isə ümumiyyətlə su-kanalizasiya idarəsi tərəfindən dərmanlanmayıb.

Etiraz edənlərin qarşısına çıxan bələdiyyə nümayəndələri isə bu məsələlərin həllinin bələdiyyənin imkanları xaricində olduğunu bildiriblər.

Kürdəmir rayon İcra Hakimiyyətindən məsələyə münasibət bildirmək istəməyiblər.