Hadisə

Ana səhifə

Hadisə

Nailə və Reyhanə Məcidovaların qətli ilə bağlı işin istintaqını aparan müstəntiq yeni faktlar açıqlayıb

04 dekabr 2008 16:00 (UTC +04:00)

Bakı. Hafiz Heydərov-APA. “Nailə və Reyhanə Məcidovaların öldürülməsi ilə bağlı cinayətlərini tutulduqları gündən tam etiraf etmiş Təvəkkül İsmayılov və onun digər qardaşları bir dəfə də olsun işgəncəyə məruz qalmaları ilə bağlı müraciət etməyiblər. Təvəkkül İsmayılov dəfələrlə cinayəti qardaşı Elnur ilə birgə törətdiyini bildirib, hadisə yerini dəqiqliklə göstərib. İstintaq hərəkətlərinin gedişində iş üzrə maddi sübut kimi Məcidova bacılarının böyürtkən yığdıqları qablar, Nailə Məcidovanın baş sancağı və alt paltarı aşkar olunaraq iş materiallarına əlavə edilib”. Bunu APA-ya açıqlamasında Bakı şəhər Prokurorluğunun İstintaq İdarəsinin rəisi, cinayət işinin sabiq müstəntiqi Zakir Saatov deyib. İdarə rəisi söyləyib ki, T. İsmayılov yalnız 1 ay 20 gün həbsdə olduqdan sonra Nailə və Reyhanə Məcidovaları, həmçinin 2005-ci ilin may ayında Diləfruz Daşdiyevanı rayon Polis Şöbəsinin rəis müavini Məmmədmusa Hüseynovun sifarişi ilə oğurlayıb ona təhvil verməsinə dair ifadə verib: “Lakin həmin faktlar istintaq zamanı təsdiqini tapmayıb. Müəyyən edilib ki, bu ifadəni Təvəkkül İsmayılov törətdikləri xüsusilə ağır cinayətlərə görə ala biləcəkləri cəzanı yüngülləşdirmək məqsədi ilə verib”.

İdarə rəisi söyləyib ki, işlə bağlı son vaxtlar media orqanlarında çıxış edən Sülh və Demokratiya İnstitutunun direktoru Leyla Yunusova konkret cinayət işlərinin istintaqından və məhkəmə baxışlarından öz siyasi məqsədi üçün istifadə edir: “O, heç bir əsası olmayan məlumatlarla cəmiyyəti və hadisədən zərərçəkmiş şəxsləri çaşdırmağa çalışır. Leyla Yunusovanın polis zabiti Məmmədmusa Hüseynovu cinayətin təşkilatçısı kimi təqdim etməsi, Diləfruz Daşdıyevanın itkin düşməsi ilə bağlı anasının ərizəsinin polis şöbəsində qəbul edilməməsi barədə iddiaları da tamamilə həqiqətdən uzaqdır. D. Daşdıyevanın itkin düşməsi ilə bağlı müraciət əsasında dərhal ilkin araşdırmaların aparılması təmin edilib. Azərbaycan baş prokuroru tərəfindən toplanmış materiallara nəzarət qaydasında baxılaraq 2007-ci il avqustun 24-də itkin düşmə faktına görə Cinayət Məcəlləsinin 120.1 maddəsi ilə cinayət işi başlanıb, istintaqın aparılması Baş Prokurorluğun Ağır Cinayətlərə Dair İşlər üzrə İstintaq İdarəsinə tapşırılıb”.

Z. Saatovun söylədiyinə görə, prosessual araşdırmalarla Təvəkkül İsmayılovun 2005-ci il mayın 18-də Diləfruz Daşdıyevanı tamah məqsədilə Samur-Abşeron su kanalına atıb öldürməsi tam sübuta yetirilib: “Eyni zamanda 2006-cı il avqustun 9-da aşkar olunmuş cəsədin Diləfruz Daşdıyevanın, 2007-ci il avqustun 9-da aşkar olunmuş cəsədin isə Nailə Məcidovanın olmaması ilə bağlı valideynlərinin istintaqın sonrakı mərhələsində ifadələrində göstərdikləri şübhələr və bu barədə bəzi KİV-lərdə dərc olunmuş məqalələr də istintaq prosesində yoxlanılıb. Məhkəmə Tibbi Ekspertizası və Patoloji Anatomiya Birliyində və sonradan Rusiya Federasiyasının müvafiq ekspertiza mərkəzində keçirilmiş məhkəmə-genetik ekspertizaların rəyləri ilə tapılmış meyitlərin Diləfruz Daşdıyeva və Nailə Məcidovaya məxsus olması təsdiqlənib”.

İşin sabiq müstəntiqi söyləyib ki, Dəvəçi və Siyəzən rayon polis şöbələri, DİN-in Daxili Qoşunları, Fövqəladə Hallar Nazirliyi və digər dövlət qurumları əməkdaşlarının iştirakı və köməkliyi ilə həyata keçirilən istintaq-əməliyyat tədbirləri, o cümlədən Samur-Abşeron su kanalında aparılan axtarışlarla Reyhanə Məcidovanın meyitinin tapılması mümkün olmasa da, hazırda bu istiqamətdə lazımi tədbirlər davam etdirilir.

Z. Saatov Təvəkkül İsmayılovun əvvəllər də bir sıra ağır cinayətlər törətdiyinə görə dəfələrlə məhkum olunduğunu xatırladıb: “ İstintaq tam obyektiv aparılıb, hazırda məhkəmə araşdırmaları davam edir. Mən bildirirəm ki, bu cinayət işi barədə Leyla Yunus və onun kimiləri qəsdən ölkənin hüquq-mühafizə orqanlarına böhtan atır, yalan məlumatlar yayaraq ictimai fikri çaşdırmağa, məhkəmənin ədalətliliyini şübhə altına almağa çalışır, özlərini cəmiyyətə layiq olmadıqları insan haqlarının müdafiəçisi qismində sırımağa cəhd göstərirlər”.