Hadisə

Ana səhifə

Hadisə

Nailə və Reyhanə Məcidova bacılarını qətlə yetirməkdə təqsirləndirilən qardaşlar vəkillərindən və növbəti məhkəmə proseslərinə qatılmaqdan imtina ediblər

05 fevral 2009 11:00 (UTC +04:00)

Bakı. Hafiz Heydərov-APA. Bu gün Ağır Cinayətlərə Dair İşlər üzrə Məhkəmədə Dəvəçi rayonunun Dağ Bilici kənd sakinləri Nailə və Reyhanə Məcidova bacılarını qətlə yetirməkdə təqsirləndirilən Qələgah kənd sakinləri - Təvəkkül, Elnur və Elçin İsmayılov qardaşlarının cinayət işi üzrə növbəti məhkəmə iclası keçirilib.
APA-nın xəbərinə görə, hakim Əhməd Quliyevin sədrliyi ilə keçirilən prosesdə Dağbilici kənd sakini Elmira Qarayeva zərərçəkən şəxs qismində ifadə verib. E. Qarayeva 12 yaşında olduğu zaman Elnur İsmayılov tərəfindən basqıya məruz qaldığını bildirib: “Mən uzunqulaqla suya getmişdim. Bulaq başında kəndçimiz Diləfruz da vardı. Su doldurub qayıdan zaman bir nəfər məni arxadan qucadladı və zorlamaq istədi. Həmin vaxt mən qışdırdım və səsimə yaxınlıqda olan insanlar eləcədə Diləfruz gəldi. Məni zorlamaq istəyən şəxs isə qaçdı. Diləfruz mənə dedi ki, onu gördüm, Elnur idi”.
Zərərçəkən onu zorlamağa cəhd göstərən şəxsin E. İsmayılov olduğunu bəyan edib. Sonra isə prosesdə E. İsmayılovun qeyri-rəsmi nikahda yaşadığı Aytən İsmayılovanın ifadəsi alınıb. A. İsmayılova da aldanaraq E. İsmayılova ərə getdiyini və onunla bir neçə il qeyri-rəsmi nikah münasibətlərində yaşadığını bildirib. O, həmçinin onlara məxsus evin E. İsmayılov tərəfindən satılaraq pulunun mənimsənildiyini söyləyib.
Prosesdə zərərçəkən şəxslərin ifadələrinə etirazını bildirən təqsirləndirilən qardaşlar qalmaqal salıblar. Onlar məhkəmə işinin düzgün aparılmadığını, onları müdafiə edən şəxslərin isə prosesə laqeyd yanaşmasını əsas gətirərək növbəti proseslərə qatılmaqdan imtina ediblər. Təqsirləndirilən qardaşlar tələb etdikləri şəxslərin şahid qismində prosesə dəvət olunmalarını təmin etmədikləri üçün elə məhkəmə zalındaca ərizə yazaraq vəkillərindən də imtina etdiklərini bəyan ediblər. Buna baxmayaraq, hakim növbəti prosesin vaxtını müəyyən edib. Məhkəmə fevralın 19-da davam etdiriləcək.

Qeyd edək ki, Təvəkkül, Elnur və Elçin İsmayılov qardaşları Dəvəçi rayonunun Dağ Bilici kənd sakinləri Nailə və Reyhanə Məcidova bacılarını qətlə yetirməkdə ittiham olunurlar. İttiham aktında Cinayət Məcəlləsinin 120.1-ci (qəsdən adam öldürmə), 149-cu (zorlama), 150.2.3-cü (azyaşlı şəxsə qarşı seksual xarakterli əməllər törətmə), 127. 1-ci (qəsdən sağlamlığa az ağır zərər vurma), 144.3-cü (adam oğurluğu), 177-ci (oğurluq), 178-ci (dələduzluq) və 221-ci (qanunsuz olaraq odlu silah, onun hissələrini hazırlama, saxlama, satma, daşıma, göndərmə) maddələri ilə ittiham olunan İsmayılov qardaşlarının ötən ilin avqustunda Məcidova bacılarını öldürdükdən sonra Samur-Abşeron kanalına atdıqları göstərilib. N. Məcidovanın meyiti keçən il avqustun 9-da Samur-Abşeron kanalının Siyəzən istiqamətində aşkarlanıb. R. Məcidovanın meyiti isə indiyədək tapılmayıb.