Hadisə

Ana səhifə

Hadisə

Müdafiə Nazirliyi: Azərbaycan əsgərinin Ermənistan rəhbərliyinə müraciət etməsi barədə bu ölkənin mətbuatında yazılanlar yalandır - FOTOSESSİYA

Müdafiə Nazirliyi: Azərbaycan əsgərinin Ermənistan rəhbərliyinə müraciət etməsi barədə bu ölkənin mətbuatında yazılanlar yalandır - <font color=red>FOTOSESSİYA</font>

05 fevral 2009 15:24 (UTC +04:00)

Bakı-APA. Ermənistan mətbuatı Azərbaycan Ordusunun əsgərinin bu ölkənin rəhbərliyinə müraciət etməsi barədə məlumat yayıb. APA-nın xəbərinə görə, Ermənistanda nəşr olunan “Versiya” qəzeti (versiya.am) yazır ki, guya Azərbaycan Ordusunun əsgəri, Sumqayıt şəhər Hərbi Komissarlığından hərbi xidmətə çağırılmış 23 yaşlı Vüsal Həsənov hərbi hissədə təzyiqlərlə üzləşdiyini əsas gətirərək, Ermənistan rəhbərliyinə müraciət edib, onlardan kömək istəyib. Yazıda qeyd olunub ki, V. Həsənov məktubunda hərbi hissə komandirinin ondan pul, telefon konturu istədiyini bildirib. Əsgər bu vəziyyətdə çox qalmaq istəmədiyini, Ermənistana, oradan isə ölkə rəhbərliyinin köməyi ilə üçüncü ölkəyə keçmək istədiyini qeyd edib.

Qeyd edək ki, müraciət edən şəxsin şəkilləri də qəzetdə dərc olunub. V. Həsənov müraciətində şəkillərini sərhədi keçən zaman ermənilərin onu tanınması üçün göndərdiyini açıqlayıb.

Azərbaycan Müdafiə Nazirliyinin mətbuat xidmətinin rəisi, polkovnik-leytenant Eldar Sabiroğlu APA-ya açıqlamasında deyib kİ, nazirlik bu məsələ ilə bağlı hərtərəfli araşdırma aparıb: “Nazirliyin tabeliyində olan hərbi hissələrdə nə əvvəllər, nə də indi xidmət göstərən bu adda əsgərin belə bir müraciətlə Ermənistan rəhbərliyinə məktub göndərməsi faktı təsdiqini tapmayıb. Məlumat yalandır”.

E. Sabiroğlu deyib ki, ermənilər bu üsullardan birinci dəfə deyil ki, istifadə edirlər: “Bununla, onlar dünya ictimaiyyətində Azərbaycan ordusu barədə mənfi fikirlər formalaşdırmaq istəyirlər. Halbuki Ermənistanın öz ordusunda baş alıb gedən nöqsanlar, cinayət hadisələri, satqınlıqlar kifayət qədərdir. Şübhəli məqamlar ilk baxışda diqqəti cəlb edir. Birincisi, niyə məhz üçüncü ölkəyə getmək istəyi barədə Ermənistana müraciət edilməli idi? Məgər bu “seçimi” müstəqil müəyyən etmək olmazdımı? İkincisi, ermənilər üçün göydəndüşmə olardı ki, əllərinə könüllü bir əsir düşsün və bunu aylarla İnternet saytlarında toy-bayrama çevirsinlər. Belə isə o zaman niyə şəkilləri əvvəlcədən dərc edib, həmin adamı hədəfə çevirirlər. Məlumatın uydurma olduğu göz qabağındadır”.

Sumqayıt Hərbi Komissarlığından da APA-ya bildirilib ki, hazırda erməni mətbuatının göstərdiyi 23 yaş həddində Vüsal Həsənov adlı Sumqayıt sakini Azərbaycan Silahlı Qüvvələrində hərbi xidmətdə deyil.

Daxili Qoşunlardan isə APA-ya qoşunlarda faktla bağlı araşdırmalar aparıldığı bildirilib.