Hadisə

Ana səhifə

Hadisə

ARDNŞ Azərbaycanda həbs olunmuş Rusiya gəmisi ilə bağlı açıqlama verib

07 fevral 2009 07:47 (UTC +04:00)

Bu barədə APA-ya ARDNŞ-dən məlumat verilib. Məlumatda bildirilir ki, əvvəlcədən əldə olunmuş razılığa baxmayaraq, gəmi sahibi müxtəlif bəhanələrlə xilasetmə əməliyyatına aid lazımi sənədləri (gəminin və yükün sığorta sənədləri) təqdim etməyib, bununla da, xilasetmə haqqında müqavilənin imzalanmasını ləngidib və nəticə etibarı ilə xilasetmə əməliyyatına görə çəkilmiş xərclərin alınması mümkün olmayıb.

Sonradan Xəzər Dəniz Neft Donanması tərəfindən “Xilasetmə haqqında” 1989-cu il tarixli Beynəlxalq Konvensiyanın tələblərinə müvafiq olaraq xilasetmə əməliyyatı ilə əlaqədar təzminat ödənilməsi barədə müvafiq iddia irəli sürülsə də, gəmi sahibi həmin iddia ilə razı olmadığını bildirib. Bununla əlaqədar, məsələnin Beynəlxalq Dəniz Arbitrajında baxılması üçün Xəzər Dəniz Neft Donanması Böyük Britaniyaya məxsus “Hill Dickinson” hüquq şirkətinin Yunanıstandakı nümayəndəliyinə müraciət edib. Məsələ arbitrajda həll olunanadək gəminin səfərini davam etdirməsi üçün gəmi sahibinin sığorta şirkəti bank zəmanəti vermədiyinə görə Xəzər Dəniz Neft Donanması 2 saylı Bakı Yerli İqtisad Məhkəməsinə müraciət edib.

Hazırda məsələ Xəzər Dəniz Neft Donanmasının və “Naviqator” şirkətinin vəkilləri tərəfindən Beynəlxalq Konvensiyaların tələblərinə və müvafiq təcrübələrə istinadən müzakirə edilir. Xəzər Dəniz Neft Donanması tərəfindən Beynəlxalq Konvensiyaların tələblərinə uyğun olaraq verilən iddianın təmin olunmasına dair məsələnin həlli və gəminin səfərini davam etdirməsi yalnız sığorta şirkəti tərəfindən bank zəmanətinin verilməsindən və ya arbitrajın müvafiq qərarından asılıdır.

Qeyd edək ki, ötən il dekabrın 15-də Rusiyanın Həştərxan şəhərindən İranın Ənzəli limanına hərəkət edən, armatur və taxta materialları yüklənmiş Rusiyaya məxsus “Sarmat-1” gəmisi “Abşeron Bankəsi” ərazisində güclü küləyin təsiri nəticəsində falşbortun aralanması və bununla əlaqədar rumpel bölməsinə suyun daxil olması səbəbindən batmaq təhlükəsi ilə üzləşib. Həmçinin “Sarmat-1” gəmisinin sükan avadanlığı sıradan çıxıb və idarəçiliyi itirilib. Həmin gün Həştərxan Liman Administrasiyasının Dəniz Qəza-Xilasetmə Mərkəzi və “Sarmat-1” gəmisinin sahibi olan “Naviqator” QSC tərəfindən edilmiş müraciətlərə əsasən, gəmi Xəzər Dəniz Neft Donanmasına məxsus “Vadim Seyidov” gəmisi vasitəsi ilə Bakıya gətirilib.

“Sarmat_1”