Hadisə

Ana səhifə

Hadisə

1 saylı Cəzaçəkmə Müəssisəsində tikiş sexinin və məhkumlar üçün yeni təmirdən çıxmış yaşayış korpusunun açılış mərasimi keçirilib

14 dekabr 2006 15:43 (UTC +04:00)

Bu gün 1 saylı Cəzaçəkmə Müəssisəsində Avropa Şurası və Avropa Komissiyası ilə birgə həyata keçirilən “Azərbaycan penitensiar sisteminin təkmilləşdirilməsi” layihəsi çərçivəsində tikiş sexinin və məhkumlar üçün yeni təmirdən çıxmış yaşayış korpusunun açılış mərasimi keçirilib. APA-nın məlumatına görə, layihə çərçivəsində pilot müəssisə kimi seçilən cəzaçəkmə müəssisəsində məhkumların əməyə cəlb olunması, onların islahı üçün müəssisə daxilində tikiş sexi üçün yer ayrılıb və sex Avropa Komissiyasının maliyyə dəstəyi ilə müasir tikiş maşını ilə təmin olunub. Ədliyyə nazirinin müavini, Penitensiar Xidmətin rəisi Nazim Ələkbərov bildirib ki, sexin təmiri Penitensiar Xidmətin vəsaiti hesabına həyata keçirilib. Texniki səbəblərdən tikiş maşınlarının müəssisədə yerləşdirilməsi gecikib. O, gələn həftənin ilk günlərində tikiş maşınlarının müəssisəyə gətirilərək quraşdırılacağını bildirib. Sexdə məhkumlar üçün geyimlərlə yanaşı, ayrı-ayrı təşkilatlardan qəbul olunan sifarişlər hazırlanacaq. Tikiş maşınlarını quraşdırandan sonra burada işləyən məhkumlar üçün avadanlıqdan istifadəni öyrənmək məqsədi ilə treninqlər təşkil olunacaq.
Daha sonra Avropa standartlarına uyğun tilikmiş kamera tipli yaşayış korpusunun açılışı olub. Müəssisənin rəisi Ramiz Quliyev bildirib ki, korpusda 100 məhkumun saxlanması üçün əlverişli şərait yaradılıb. Kameralardan 50-i çətin tərbiyə olunan, əməyə münasibəti mənfi olan məhkumlar üçün nəzərdə tutulub. Bu kameralarda saxlanan məhkumlara gün ərzində 1 saat gəzintiyə icazə verilib. Qırmızı qapılı bu kameralarda 2-8 məhkum saxlanılacaq. Hər məhkum üçün Avropa standartlarına uyğun 4 kv metr sahə nəzərdə tutulub. 50 nəfər əməyə cəlb olunmuş məhkumlar isə sarı qapılı kameralarda saxlanılacaq. Bu məhkumlara digərlərindən fərqli olaraq, sərbəst şəkildə gəzintiyə çıxmaq imkanı verilib. Gələcəkdə müəssisə daxilindəki digər yaşayış korpuslarının yeniləri ilə əvəzlənməsi nəzərdə tutulub.
Korpusa baxış keçiriləndən sonra layihə çərçivəsində görülən işlərlə bağlı Avropa Şurasının layihədə iştirak edən ekspertləri və Penitensiar Xidmətin rəhbərliyi mətbuata ətraflı məlumat verib. N.Ələkbərov bildirib ki, layihə başa çatsa da, gələcəkdə Avropa Şurası və Avropa Komissiyası ilə əməkdaşlığın davam etdirilməsi nəzərdə tutulub. Nazir müavininin sözlərinə görə, 2008-ci ildə qanunvericiliyin təkmilləşdirilməsi, məhkumların reabilitasiyasının təşkili istiqamətində yeni layihənin icrasına başlanması nəzərdə tutulub. Artıq bu layihə üzərində iş getdiyini deyən N. Ələkbərov maliyyənin ayrılması üçün Avropa Komissiyasına müraciət olunacağını bildirib. Çıxış edən ekspertlər layihə çərçivəsində görülən işləri yüksək qiymətləndirib və qeyd ediblər ki, gələcəkdə azərbaycanlı mütəxəssislərlə yeni layihələr üzərində işləyəcəklər. Həmçinin Azərbaycanın bu sahədəki mütəxəssislərinin təcrübəsindən digər Avropa ölkələrində keçiriləcək layihələrdə istifadə olunacaq, onlar həmin layihələrdə ekspert qismində çıxış edəcəklər. Qeyd edək ki, cari ilin əvvəllərində başlayan və dörd istiqamətdə həyata keçirilən layihələrin yekunları ilə bağlı sabah ədliyyə naziri Fikrət Məmmədovun iştirakı ilə tədbir keçiriləcək. /APA/