Hadisə

Ana səhifə

Hadisə

Füzulidə qatar minik avtomobili ilə toqquşub

27 iyun 2007 09:01 (UTC +04:00)

İyunun 25-də saat 19:00 radələrində Füzuli rayonunun Böyük Bəhmənli kəndində Azərbaycan Dövlət Dəmir Yolunun (ADDY) yol ölçən qatarı həmin kəndin sakini Cəmil Abbasovun idarə etdiyi 10 ME 367 dövlət nömrə nişanlı VAZ-2107 markalı maşını vurub. APA-nın məlumatına görə, hadisə avtomobil qorunmayan dəmir yolu keçidindən keçərkən baş verib. Avtomobildə olan 3 nəfər yaralanıb. Yaxınlıqda yerləşən hərbi hospitala çatdırılan yaralılardan birinin böyrəyi çıxarılıb və hazırda vəziyyəti ağırdır.
Nəqliyyat Nazirliyinin Nəqliyyatda təhlükəsizlik və fövqəladə hallar şöbəsinin müdiri Kazım Şərifov APA-ya açıqlamasında hadisəni təsdiqləyib. K. Şərifovun bildirib ki, hadisə baş verərkən ADDY-nin 7001 saylı yol ölçən qatarı 40 km/saat sürətlə hərəkət edib. Maşinistin hadisənin qarşısını almaq üçün etdiyi bütün cəhdlər nəticə verməyib. K. Şərifovun sözlərinə görə, hadisənin baş verməsinə səbəb avtomobilin sürücüsü tərəfindən “Yol hərəkəti haqqında” qanunun 44-cü maddəsinin pozulması olub. hazırda faktla bağlı araşdırma aparılır. /APA/