Hadisə

Ana səhifə

Hadisə

Gəncənin Zülfi Hacıyev küçəsinin bir qrup sakini dəmiryolu xəttində aksiya keçiriblər

09 iyul 2007 09:45 (UTC +04:00)

Dünən Gəncənin Zülfi Hacıyev küçəsində yerləşən 17 və 18 saylı binaların sakinləri, əsasən qadın və uşaqlar şəhər dəmiryolu vağzalında etiraz aksiyası keçiriblər. APA-nın Qərb bürosunun məlumatına görə, qadın və uşaqların Gəncə-Bakı sərnişin qatarının qarşısını kəsməsi nəticəsində qatarın hərəkəti 10 dəqiqə ləngiyib. Polis əməkdaşlarının müdaxiləsi nəticəsində qatarın gedişi bərpa edilib. Sakinlərin sözlərinə görə, onları bu addımı atmağa vadar edən 3 il müddətində içməli su probleminin həll olunmamasıdır: “3 ildir ki, suyumuz gəlmir, xüsusilə yay aylarında sudan əziyyət çəkirik, hər yerə bu problemlə bağlı şikayət etsək də şikayətlərimiz cavabsız qalır. Əgər bizim suyumuz gəlməsə, digər qatarlarında yolunu kəsəcəyik”. Aksiya ilə əlaqədar hadisə yerinə gələn müvafiq qurumların rəhbərləri adı çəkilən binalara daim su verildiyini, lakin texniki səbəblərdən suyun evlərə çatdırılması mümkün olmur: “Buna səbəb qarşıda yerləşən binaların sakinlərinin sudan israfçılıqla istifadə etməsidir. Həmin sakinlər ana xəttə qeyri-qanuni xətlər calayıblar. Əlavə xətlər ana xətdə suyun təzyiqini aşağı saldığından 17 və 18 saylı binalara su qalxmır. Bununla belə problemin həlli üçün müvafiq tədbirlər görüləcək”. /APA/