Hadisə

Ana səhifə

Hadisə

Yol qəzalarında 7 nəfər həlak olub

18 mart 2008 13:21 (UTC +04:00)

Bakı. Məhbubə Qasımbəyli APA. Abşeron rayonunda ölümlə nəticələnən yol-nəqliyyat hadisəsi baş verib. Daxili İşlər Nazirliyinin mətbuat xidmətindən APA-ya verilən məlumata görə, rayonun Mehdiabad qəsəbəsində Bakı şəhər sakini Rizvan Səfərovun idarə etdiyi "VAZ-2103" və Digah qəsəbə sakini Seymur Mirzəyevin idarə etdiyi "ZİL" markalı avtomaşınlar toqquşub. Nəticədə R.Səfərovun sərnişini, atası Hikmət hadisə yerində keçinib. Faktla bağlı Abşeron RPŞ-də araşdırma aparılır.
Siyəzən rayonunda Quba rayon sakini Hümmət Əliyev idarə etdiyi "Mercedes" markalı avtomaşını yolun kənarında dayanmış "KamAZ" markalı avtomaşına vurub. Nəticədə hadisə yerinin yaxınlığında olan Quba rayon sakini Elşam Rəhmanov olay yerində ölüb, xəsarət almış H.Əliyev və sərnişinləri, arvadı Nuranə, qızı Kamilla və Quba rayon sakini Şərqiyyə Əliyeva xəstəxanaya yerləşdiriliblər. Faktla bağlı Siyəzən RPŞ-də araşdırma aparılır.
Cəlilabad rayonunun Alar kəndində Göytəpə şəhər sakini Azər Məmmədovun idarə etdiyi "Mercedes", Lənkəran şəhər sakini Cəlal Hüseynovun idarə etdiyi "Mercedes" və Bakı şəhər sakini Ramiz Kərimovun idarə etdiyi "İkarus" markalı avtomaşınlar toqquşub. Nəticədə A.Məmmədov və sərnişinləri, Göytəpə şəhər sakinləri Sübhan Gözəlov, Şahmar Məmmədov hadisə yerində dünyasını dəyişib, xəsarət almış Bakı şəhər sakini Əhəd Əhədov isə xəstəxanaya yerləşdirilib. Faktla bağlı Cəlilabad RPŞ-də araşdırma aparılır.
Salyan rayonunun Şorsulu kəndində Lənkəran şəhər sakini Əliəşrəf Allahquliyevin idarə etdiyi "KamAZ" və Cəlilabad rayon sakini Rafiq Yusifovun idarə etdiyi "VAZ-21011" markalı avtomaşınlar toqquşub. Nəticədə R.Yusifov və sərnişini, Cəlilabad rayon sakini Qızqayıt Xudaşova hadisə yerində ölüb. Faktla bağlı Salyan RPŞ-də araşdırma aparılır.
Ağcabədi rayonunda, rayon sakini Röya Namazov idarə etdiyi "VAZ-21099" markalı avtomaşını həmyerlisi Gülnarə Hüseynovanı vurub. Nəticədə G.Hüseynova hadisə yerində keçinib. Faktla bağlı Ağcabədi RPŞ-də araşdırma aparılır.