Hərbi

Ana səhifə

Hərbi

Eldar Sabiroğlu: “Müdafiə zolağında azərbaycanlı qadının öldürülməsi faktı ilə bağlı Hərbi Prokurorluqda istintaq gedir”

22 dekabr 2009 12:33 (UTC +04:00)

Bakı - APA. Müdafiə zolağında azərbaycanlı qadının öldürülməsi faktı ilə bağlı Hərbi Prokurorluqda istintaq gedir. Bunu APA-nın sualına cavab olaraq Müdafiə Nazirliyinin mətbuat xidmətinin rəisi, polkovnik-leytenant Eldar Sabiroğlu bildirib. E. Sabiroğlu deyib ki, indi hadisə barədə qəti və birmənalı fikir söyləmək çətindir: “Qeyd etdiyimiz kimi, hələlik hadisənin səbəbləri tam məlum deyil. Hərbi Prokurorluq bununla bağlı istintaq aparır. Ehtimallar müxtəlif ola bilər. İstintaqın başladığı halda bizim ehtimallardan birinin üzərində dayanmamız və bu barədə məlumat yaymamız səhv olardı, bu həm də istintaqın işinə müdaxilə kimi qiymətləndirilə bilər”.

Nazirlik sözçüsü deyib ki, araşdırmanın yekununu gözləmək lazımdır: “Yəqin ki, proses uzun çəkməz. Bundan sonra hadisənin səbəbi barədə təfərrüatı ilə məlumat vermək mümkün ola bilər”.

Qeyd edək ki, Müdafiə Nazirliyinin mətbuat xidmətinin yaydığı məlumata görə, Ağdam rayon sakini Sədaqət Paşa qızı Məmmədova hələlik səbəbləri tam müəyyən edilməyən bir vəziyyətdə dekabrın 20-də səhər saatlarında müdafiə zolağına daxil olub. Bu zaman Azərbaycan hərbçiləri tərəfindən həmin istiqamətə atəş açılıb və qadın aldığı yaralardan yerindəcə vəfat edib.

Xatırladaq ki, APA-nın Qarabağ bürosunun xəbərinə görə, Ağdam rayon sakini Məmmədova Sədaqət Paşa qızı iki gün əvvəl yaşadığı evi tərk edib və geri dönməyib.

Mərhumun Xındırıstan kəndində anadan olduğu, Alıbəyli kəndinə ərə getdiyi bildirilir. Bir müddət əvvəl həyat yoldaşından boşanan S. Məmmədova Xındırıstan kəndində yaşayan qızının yanına qayıdıb.

Kənd sakinləri ailəsi dağılandan sonra S. Məmmədovanın psixi sarsıntı keçirdiyini, xəstə olduğu bildiriblər. Sakinlərin dediyinə görə, qadın iki gün əvvəl yoxa çıxıb.

atəşkəs