Hərbi

Ana səhifə

Hərbi

Azərbaycan ərazisində ilk dəfə olaraq maqnit minalar tapılıb

28 yanvar 2010 18:38 (UTC +04:00)

Bu barədə APA-ya Azərbaycan Ərazilərinin Minalardan Təmizlənməsi üzrə Milli Agentliyin (ANAMA) Güzdəkdəki əməliyyat qrupunun rəhbəri Adil Aslanov məlumat verib.

ANAMA nümayəndəsi 2009-cu ilin iyun ayından başlamış təmizləmə əməliyyatları çərçivəsində ərazidən 2 725 ədəd partlamamış hərbi sursat (PHS), 39 ədəd piyada əleyhinə mina, 65 kq-a yaxın trotil qırıntısının yığılaraq zərərsizləşdirildiyini bildirib.

A. Aslanovun sözlərinə görə, Güzdək bazasında qeydə alınmış 22 anbarda əsasən sovet ordusu təxribat xarakterli döyüş sursatlarını saxlayıb. ANAMA əməkdaşları 10 illik fəaliyyətləri dövründə Azərbaycanda ilk dəfə burada maqnit minalara, terror üçün istifadə olunan plastik partladıcılara (C4) rastlaşıblar.

A. Aslanov bildirib ki, layihədə ərazinin 24 aya təmizlənməsi nəzərdə tutulsa da, işlərin ağırlığı ilə əlaqədar olaraq bu proses uzana bilər. Hazırda ərazidə təmizləmə əməliyyatı əllə qazma üsulu ilə aparılır. Təmizləmə əməliyyatlarında ANAMA-nın 12 minaaxtaranı və 4 yardımçı heyəti çalışır.

Qeyd edək ki, maqnit minalar eyni zamanda dəniz-sualtı əməliyyatlarında gəmilərə, sualtı qayıqlara qarşı da istifadə olunur.