Hərbi

Ana səhifə

Hərbi

Müdafiə Nazirliyinin “dedovşina” da təqsirləndirilən hərbçiləri məhkəmədə ifadə verib

15 mart 2010 11:40 (UTC +04:00)

Bakı. Ramil Məmmədli – APA. Ağır Cinayətlərə Dair İşlər üzrə Hərbi Məhkəmədə “dedovşina” da təqsirləndirilən Müdafiə Nazirliyinin “N” saylı hərbi hissəsində xidmət edən hərbçilərin cinayət işi üzrə məhkəmə baxışı başlayıb. APA-nın xəbərinə görə, hakim İsgəndər Hacıyevin sədrliyi ilə keçirilən prosesdə prokuror ittihamı elan edib.

İttihama görə, Müdafiə Nazirliyinin Şəmkirdə yerləşən “N” saylı hərbi hissəsində xidmət edən hərbi qulluqçular – Şamxal Mehdi oğlu Mehdiyev və Cəsarət Elman oğlu Qasımov
2009-cu ilin yanvar-iyul aylarında qrup halında tabeliklərində olmayan əsgərlərə qarşı nizamnamədən kənar hərəkətlər ediblər. Təqsirləndirilən şəxslər gənc əsgərlərin aylıq məvaciblərinin bir qismini onların əlindən alıblar. Həmçinin gənc əsgərlərə zor tətbiq ediblər.

Təqsirləndirilənlər Cinayət Məcəlləsinin 182-ci (hədə-qorxu ilə tələb etmə, yəni zərərçəkmiş şəxsin və ya onun yaxın qohumlarının şəxsiyyəti üzərində zor göstərmə, onların haqqında rüsvayedici məlumatlar yayma və ya onların əmlakını tələf etmə hədəsi ilə özgənin əmlakını və ya əmlaka olan hüququnu və ya əmlak xarakteri daşıyan digər hərəkətlər etməsini tələb etmə) və 332-ci (tabelik münasibətlərində olmayan hərbi qulluqçular arasında qarşılıqlı münasibətlərin nizamnamə qaydalarını pozma, zərərçəkmiş şəxsin şərəf və ləyaqətini alçaltmaqla və ya ona qarşı zor tətbiq etməklə əlaqədar olduqda) maddələri ittiham olunurlar.

Sonra prosesdə təqsirləndirilənlər ifadə veriblər. Onlar tabeçiliklərində olmayan əsgər yoldaşlarına qarşı nizamnamədən kənar cinayət tərkibi olan hərəkət etdiklərini təsdiqləyiblər. Lakin ittiham üzrə özlərini qismən təqsirli hesab ediblər.

Sonra prosesdə zərərçəkən və şahidlər ifadə veriblər.

Proses martın 29-da davam etdiriləcək.

Qeyd edək ki, cinayət işi üzrə 13 nəfər zərərçəkən, 10-dan çox isə şahid tanınıb.