Hərbi

Ana səhifə

Hərbi

Eldar Sabiroğlu: “Hərbi komissarların bir hissəsi təqaüdə, digər bir hissəsi qoşunlarda xidmətə göndərilib, bəziləri isə işdən uzaqlaşdırılıb”

02 aprel 2010 13:24 (UTC +04:00)

Bakı-APA. “Son vaxtlar hərbi komissarlıqlarla bağlı əsası olmayan məlumatlar verilir. Əslində hərbi çağırışla bağlı bəzi şəxslərin yanlış tənqidlərinə baxmayaraq proses bütövlükdə ictimaiyyət tərəfindən öz dəstəyini tapıb. Hər şeydən əvvəl, aparılan səmərəli təkmilləşdirmə işləri bu rəyin formalaşmasında əsaslı rol oynayıb. Müdafiə Nazirliyi, həqiqətən də, bu məsələdə şəffaflığın və ədalət prinsipinin qorunmasına maksimum dərəcədə çalışır. Ola bilsin bəziləri razılaşmasın, ancaq nazirlik həyata keçirilən bu islahatla artıq müsbət təcrübənin bünövrəsini qoyub”.
APA-nın xəbərinə görə, bu barədə Müdafiə Nazirliyinin mətbuat xidmətinin rəisi, polkovnik-leytenant Eldar Sabiroğlunun açıqlamasında bildirilib. E. Sabiroğlu deyib ki, hərbi komissarlıqlarla bağlı bəzi yanaşmalarla razılaşmaq mümkün deyil: “Hərbi komissarlıqların ləğvi barədə qərarın olduğunu hansı məntiqlə irəli sürmələri anlaşılan deyil. Bunlar hamısı məqsədli və sifarişli şəkildə ortaya atılır. Çünki belə bir qərar yoxdur və göründüyü kimi, hazırda da hərbi komissarlıqlar fəaliyyət göstərir. Bəzi hərbi komissarların işdən götürülməsinə gəldikdə isə deyə bilərik ki, burada da qeyri-adi bir şey axtarmağa lüzum yoxdur. Onların bir hissəsi təqaüdə, digər bir hissəsi isə qoşunlarda xidmətə göndərilib. Aralarında elələri də olub ki, tutduqları vəzifəni layiqincə yerinə yetirmədiklərinə görə işdən uzaqlaşdırılıblar”.

Nazirlik sözçüsü deyib ki, hərbi komissarlıqların ayrıca, müstəqil struktur kimi təqdim olunması da mövcud qanunvericiliklə səsləşmir: “Biz əvvəllər də bu məsələyə münasibətimizi bildirmişik. Yenə də aydınlıq gətirilməsi üçün görünür, konkret izaha ehtiyac vardır. Qanunvericiliyə görə, hərbi komissarlıqlar bir başa Müdafiə Nazirliyinə tabe olan təşkilatdır, daha dəqiq ifadə etsəm, onun bir idarəsidir. Başqa idarələr kimi hərbi komissarlıqlar da bilavasitə müdafiə nazirinin rəhbərliyi altında fəaliyyət göstərir, onun əmr və göstərişlərini yerinə yetirir. Digər yanaşmalar isə sadəcə, fikirləri çaşdırmağa yönələn cəhd kimi qəbul edilməlidir. Təkmilləşdirmə prosesinin ilk ayında müəyyən xırda problemlər olsa da, indi bütün bunlar aradan qaldırılıb. Hərbi komissarlıqlardan Müdafiə Nazirliyinə göndərilən siyahılar dərhal kompüterə daxil olur və buradan da nazirin əmri ilə yaradılmış səlahiyyətli şəxslərdən ibarət komissiya tərəfindən hərbi hissələrə bölüşdürülür. Sonra da hazır siyahılar yenidən hərbi komissarlıqlara göndərilir. Qarşıya qoyulan vəzifə yüksək məsuliyyətlə yerinə yetirilir. Hələ bu günə kimi çağırışla əlaqədar nə qaynar xəttə, nə də vətəndaşların müraciətləri ilə əlaqədar yaradılmış komissiyaya əsaslı bir şikayət daxil olmayıb”.

hərbi komissarlıq