Hərbi

Ana səhifə

Hərbi

Mayın 10-13-də Ammanda Beynəlxalq SOFEX-2010 Xüsusi Əməliyyatlar Sərgisi və konfransı keçiriləcək

01 may 2010 10:48 (UTC +04:00)

Bu barədə APA-ya sərginin təşkilat komitəsindən məlumat verilib.

İordaniyanın kralı II Abdullahın himayəsi altında keçiriləcək SOFEX-2010-da dünyanın 34 ölkəsindən 319 müdafiə şirkətləri öz məhsullarını nümayiş etdirəcək.

Sərginin ilk günü - mayın 10-da müxtəlif ölkələrin Silahlı Qüvvələrinin nümayəndələrinin və ekspertlərin, araşdırma mərkəzlərinin ekspertlərinin iştirakı ilə «Xüsusi qüvvələr: gələcəyə baxış» adlı bir günlük konfrans keçiriləcək. Yaxın Şərq və Körfəz Hərbi Analitik İnstitutu (İNEGMA) tərəfindən beşinci dəfədir xüsusi qüvvələr üçün təşkil olunmuş bu konfransda bölgə ölkələrinin silahlı qüvvələrinin yüksək rütbəli zabitlərinin çıxışları olacaq.

İordaniya Kral Hərbi Hava Qüvvələrinin «Marka» aviabazasında açılacaq sərginin rəsmi tərəfdaşları kimi dünyanın müdafiə sektorunun Orange, NP Aerospace, CNS Primus, FLIR, Northrop Grumman, General Dynamics və Raytheon kimi nüfuzlu şirkətləri çıxış edir. Sərgidə ən çox şirkətlə ABŞ, İordaniya, Türkiyə, Böyük Britaniya, Fransa, Çexiya və Rusiya təmsil olunacaq.

İordaniya kralının iştirakı ilə keçirilən sərginin 12 minə yaxın şəxs tərəfindən ziyarət olunacağı gözlənilir. Onların arasında müxtəlif ölkələrin silahlı qüvvələrinin yüksək rütbəli rəsmiləri, təchizat şirkətləri və s. olacaq.

Sərgidə Azərbaycan Müdafiə Sənayesi Nazirliyinin müəssisələri ayrıca pavilyonda öz məhsullarını nümayiş etdirəcək. Sərgiyə dəvətli olan qonaqlar arasında Azərbaycanın müdafiə naziri, Dövlət Sərhəd Xidmətinin rəisi, Daxili Qoşunların, Milli Təhlükəsizlik və Daxili İşlər nazirliklərinin rəsmiləri də var.

APA-nın əldə etdiyi məlumatlara görə, SOFEX Azərbaycanın müstəqil olaraq qatıldığı ikinci beynəlxalq müdafiə sərgisidir. Azərbaycan Müdafiə Sənayesi Nazirliyi sərgidə «İstiqlal» tipli 14,5 və 12,7 mm çaplı snayper tüfənglərini, tapançalar, müxtəlif çaplı güllələr, minaatanlar, aviabombalar, uzaqdan komandalı mina partladıcıları, Cənubi Afrika Respublikasının «Paramount Group» şirkəti ilə müştərək istehsal etdiyi zirehli texnikaları, radioelektron sənayedə istifadə olunan elektron çap lövhələri və s. nümayiş etdirəcək.