Hərbi

Ana səhifə

Hərbi

İstanbul şəhərində İDEF-2011 müdafiə sərgisi başa çatıb

13 may 2011 17:40 (UTC +04:00)

İstanbul. Rəşad Süleymanov – APA. Türkiyənin İstanbul şəhərində keçirilən İDEF-2011 müdafiə sərgisi başa çatıb. APA-nın sərgidə iştirak edən əməkdaşının verdiyi məlumata görə, əsasən Türkiyə şirkətlərinin çoxluq təşkil etdiyi sərgidə Azərbaycan da təmsil olunub.
Sərgidə başlanğıc gündən Azərbaycan stendi marağa səbəb olub. ABŞ, İngiltərə, İsveç, Almaniya milli pavilyonları ilə yanaşı yer alan Azərbaycan MSN-in stendi çox sayda ölkədən hərbçilər və nümayəndə heyətləri tərəfindən ziyarət olunub. Türkiyə prezidenti, müdafiə naziri, Baş Qərargah rəisi, Müdafiə Sənayesi Katibliyinin rəhbəri, Gürcüstan müdafiə naziri, Ukrayna, Rusiya, Pakistan, Qazaxıstanın müxtəlif qurumlarının nümayəndə heyətləri Azərbaycan stendində olub. Bu ölkələrin nümayəndə heyətləri ilə ikitərəfli görüşlərdə hərbi-texniki əməkdaşlıq məsələləri müzakirə olunub.
Sərgi çərçivəsində Azərbaycan milli istehsal olan 89 adda məhsulu nümayiş etdirib. İlk dəfə olaraq bu sərgidə 82 mm çaplı minaatan, 12.7 mm çaplı “İstiqlal” snayper tüfəngi, tank əleyhinə qumbaraatan, PKM əl pulemyotu, tank və zirehli maşınlar üzərində qurulan pulemyot əyani şəkildə, İsrail şirkəti ilə birgə “AZAD Systems” firması tərəfindən istehsal olunmuş “Orbiter” və “Sercher” pilotsuz aparatları, “Paramount Group” şirkəti ilə birgə istehsal olunmuş “Matador” və “Marauder” tipli minaya qarşı qorumalı nəqliyyat vasitələrinin maketləri nümayiş etdirilib. “İstiqlal” snayper tüfənginin 12.7 və 14.5 mm çaplı versiyaları isə sərgidə maraqla qarşılanıb. Çapına görə sərgidə nümayişə çıxarılmış “Truvelo” şirkətinin snayper tüfəngindən sonra ikinci olan “İstiqlal” İDEF davam etdiyi müddətdə Türkiyə Silahlı Qüvvələrinin zabitləri və mütəxəssisləri ilə yanaşı Pakistan, İordaniya, bir sıra ərəb və NATO ölkələrindən olan hərbçilərin marağına səbəb olub. Bu silahın özəllikləri barədə ziyarətçilərə geniş məlumat verilib.
Sərgidə MSN-lə yanaşı Azərbaycandan müdafiə naziri Səfər Əbiyev və fövqəladə hallar naziri Kəmaləddin Heydərovun rəhbərlik etdiyi nümayəndə heyətləri və DSX-nın nümayəndələri də iştirak edib.
Növbəti İDEF 2013-cü ildə yenə İstanbulda keçiriləcək.
Qeyd edək ki APA-nın əməkdaşlarının sərgidə iştirakına ”Paramount Group” şirkəti dəstək verib.