Hərbi

Ana səhifə

Hərbi

Azərbaycan Türkiyənin “Yüksel Savunma” şirkətinin istehsalı olan uzaqdan komandalı silah sistemlərinə maraq göstərir

19 may 2011 09:06 (UTC +04:00)

APA-nın məlumatına görə, ötən həftə Türkiyənin İstanbul şəhərində keçirilmiş İDEF-2011 müdafiə sərgisi çərçivəsində şirkətin stendində əyani nümayiş etdirilən «Növbətçi» (RoboGuard), stabil və nəqliyyat vasitələri üzərində qurulan YAK, dəniz platformaları üçün hazırlanmış D-YAK silah sistemləri ilə maraqlanıblar. Şirkətin rəhbəri Hayrı Esen Azərbaycan heyətlərinə silahların texniki-taktiki göstəriciləri barədə məlumat verib.

Azərbaycan Silahlı Qüvvələri üçün YSS silah sistemlərinin təqdimatını keçirdiklərini deyən H. Esenin sözlərinə görə, Azərbaycan hərbçiləri 100 faiz türk mühəndisləri tərəfindən hazırlanmış bu sistemlərə böyük maraq göstəriblər.

«Azərbaycanın problemli ərazilərinin olduğunu bilirik. Həmin bölgələr üçün bu silah sistemi çox əhəmiyyətlidir. Biz Azərbaycan hərbçiləri və müdafiə sənayesi nazirinə bu sistemlərin təqdimatını keçirdik», - deyə şirkət rəhbəri vurğulayıb.

Qeyd edək ki, bütün silah sistemləri uzaqdan komandalı müşahidə platformasına malikdir. Bu platforma üzərində silahlarla yanaşı termal və elektrooptik kamera, kamera sensorları və lazer məsafə ölçən qurulub.

H. Esen uzaqdan komandalı silah sistemlərinə bir çox ölkələrdən diqqət göstərildiyini söyləyib. Azərbaycanla adıçəkilən sistemlərin alqı-satqısı ilə yanaşı birgə istehsalının da mümkün olduğunu vurğulayıb.