İncəsənət

Ana səhifə

İncəsənət

Eldar Mansurov: “Telekanalların musiqi redaksiyalarına musiqidən xəbəri olmayanlar rəhbərlik edir”

22 iyun 2009 14:49 (UTC +04:00)

Bakı. Ülkər Qasımova - APA. Azərbaycan Bəstəkarlar İttifaqı İdarə Heyətinin növbəti iclası keçirilib. APA-nın məlumatına görə, Azərbaycan Bəstəkarlar İttifaqının sədri, xalq artisti, professor Firəngiz Əlizadənin sədrlik etdiyi iclasda son bir il ərzində təşkilatın gördüyü işlərdən danışılıb. F. Əlizadə il ərzində Bəstəkarlar İttifaqı tərəfindən həyata keçirilən və ölkənin musiqi həyatı üçün böyük əhəmiyyət kəsb edən tədbirləri görüş iştirakçılarına xatırladıb.

İttifaqın katibi, xalq artisti, professor Aqşin Əlizadə ötən müddət ərzində bəstəkarlar Azər Dadaşov, Sərdar Fərəcov, Cahangir Zülfüqarov və digərlərinin əsərlərini dinlədiklərini deyib: “Doğrudur, əsərlər bəstələnir, amma çox istərdim ki, dərin mənalı yeni əsərlərə qulaq asım. Adlarını sadaladığım bəstəkarlar buna qadirdir. Amma əsərlərin yazılması üçün maddi stimul yoxdur. SSRİ dövründə əsərlərə görə bəstəkarlar lazımi qədər qonorar alırdılar. Amma indi Bəstəkarlar İttifaqı nə qədər səy göstərsə də, bəstəkarların əsərləri alınmır”.

İttifaqın digər katibi, əməkdar incəsənət xadimi Eldar Mansurov mahnı janrı sahəsində mövcud olan problemlərdən bəhs edib: “Biz bir dəfə bununla bağlı yığıncaq keçirdik, özəl telekanallara müraciətlər göndərdik. Özəl telekanallar mahnı janrını bərbad hala salıb. Mədəniyyət və Turizm Nazirliyinə və Bəstəkarlar İttifaqına bu vəziyyəti normallaşdırmaq üçün müəyyən səlahiyyət verilməlidir. Nazirliklə birlikdə Bədii Şura yaratmalıyıq. Lakin bu gün bədii şuraların əleyhinə olanlar da çoxdur. Çünki telekanalların musiqi redaksiyalarına musiqidən xəbəri olmayanlar rəhbərlik edir”.

Sənətşünaslıq doktoru Zemfira Səfərova çıxışında qarabağlı gənclərin bəstəkarlığa maraq göstərməməsindən narahatlığını dilə gətirib: “Qarabağ 17 ildir ermənilərin işğalı altındadır. Bəs nə üçün bu illər ərzində ermənilər Qarabağda tanınmış bəstəkar, müğənni və ya muğam ifaçısı yetişdirməyib? Çünki bu torpaq əvvəlcədən bizim olduğu üçün onun kodu bağlanıb və bu kodu yalnız biz aça bilərik. İnşallah, o torpaqları qaytardıqdan sonra Qarabağ bülbüllərinin sayı yenə artacaq, bəstəkarlığa meyl edən gənclərin sayı çoxalacaq”.