İncəsənət

Ana səhifə

İncəsənət

Azərbaycan musiqiçisi Beynəlxalq Caz Festivalında birinci yeri tutub

20 iyul 2009 17:12 (UTC +04:00)

Bakı. Ülkər Qasımova – APA. İyulun 2-19-da İsveçrənin Montrö şəhərində keçirilən Beynəlxalq Caz Festivalı çərçivəsində keçirilən beynəlxalq müsabiqədə Azərbaycanı təmsil edən caz ifaçısı İsfar Sarabski birinci olub. APA-nın məlumatına görə, Azərbaycan musiqiçilərinin festivalda ilk konserti iyulun 15-də “Şərq həzzi: Azərbaycan” adı altında keçirilib.

İyulun 15-də “Montrö Caz Kafe”də Emil İbrahim və qrupu, iyulun 16-da həmin zalda Zülfüqar Bağırovun kvarteti çoxsaylı tamaşaçı kütləsini heyran edib. İyulun 16-da başlanan yarımfinal iyulun 17-də 16 nəfərdən 5-nin iştirakı ilə davam edib. Həmin gün azərbaycanlı İsfar Sarabskinin çıxışı dinlənilib. İyulun 18-də keçirilən final mərhələsinin nəticələrinə görə Azərbaycan cazmeni İsfar Sarabski qalib elan olunub. Bütün münsiflərin rəğbətini qazanan 20 yaşlı cazmenlə birinci yeri bölüşən azyaşlı gürcü pianoçusu Beko Qoçiaşvili isə yaşının az olmasına rəğmən, belə bir formatda yarışmaya qoşulduğuna görə təqdir olunub.

Azərbaycanın əməkdar artisti Salman Qəmbərov-pianoçu-bəstəkar öz qrupu - Vaqif Əliyev, Tofiq Cabbarov-zərb alətləri, Emil Hüseynov-bas gitara ilə birgə iyulun 18-də gündüz saatlarında “Pöttit Pale” otelinin konsert zalında fövqəladə konsert verib. Həmin gün “Şate dö Şiyon” adlanan qədim Avropa qəsrində isə Azərbaycan yeməkləri və şirniyyatlarından, Azərbaycan geyimlərindən, “Azərbaycan” fotostendindən və Əzizə Mustafazadənin simasında Azərbaycan musiqisindən ibarət ziyafət baş tutub. Musiqiçilər iyulun 20-də Vətənə dönüblər.

Onu da bildirək ki, festival çərçivəsində keçirilən beynəlxalq müsabiqədə ikinci yerə alman musiqiçisi Frans fon Çossi, üçüncü yerə isə isveçrəli Klod Diallo layiq görülüb.