İncəsənət

Ana səhifə

İncəsənət

Sumqayıtda I Ümumrespublika Dekorativ-Tətbiqi Sənət Festivalının açılışı olub

25 sentyabr 2009 19:41 (UTC +04:00)

Bakı. Ülkər Qasımova – APA. Sumqayıtda I Ümumrespublika Dekorativ-Tətbiqi Sənət Festivalının açılışı olub.

Sumqayıt şəhər İcra Hakimiyyətinin mətbuat xidmətindən APA-ya verilən məlumata görə, Sumqayıt Dövlət Rəsm Qalereyasında keçirilən I Ümumrespublika Dekorativ-Tətbiqi Sənət Festivalı Mədəniyyət və Turizm Nazirliyinin təşkilatçılığı ilə baş tutub. Tədbirdə Mədəniyyət və Turizm Nazirliyinin Təsviri və dekorativ sənət sektorunun müdiri Leyla Axundzadə, Dövlət Rəsm Qalereyasının direktoru Arif İbrahimov, Azərbaycan xalçası və xalq tətbiqi sənəti Dövlət Muzeyinin direktoru Röya Tağıyeva, Dövlət İncəsənət Muzeyinin direktoru İsrafil İsrafilov, Mədəniyyət və İncəsənət Universitetinin professoru Arif Əzizov, Rəssamlıq Akademiyasının Dekorativ-tətbiqi sənət kafedrasının dosenti Məmmədhüseyn Hüseynov, Təsviri və dekorativ sənət sektorunun məsləhətçisi Qalib Qasımov, Elmi-Metodik Mərkəzin əməkdaşı Polad Zeynalov və şəhər ictimaiyyətinin iştirak edib.

Festivalın açılış mərasimində çıxış edən Sumqayıt ŞİH başçısının müavini Ramiz Həsənov və Azərbaycan xalçası və xalq tətbiqi sənəti Dövlət Muzeyinin direktoru Röya Tağıyeva festival iştirakçılarını təbrik edərək, onlara uğurlar arzulayıblar.

Qeyd edək ki, festivalda Sumqayıt şəhərinin, eyni zamanda Abşeron rayonunun dekorativ-tətbiqi sənət növü ilə məşğul olan peşəkar, eyni zamanda həvəskar sənət ustaları iştirak ediblər. Sərgidə müxtəlif texnikalarda işlənmiş ümumilikdə 322 sənət nümunəsi nümayiş etdirilib. Bu sənət nümunələri sırasına milli musiqi alətləri, təkəlduz-tikmə, ağacdan oyma və ağac üzərində yandırma, tikmə, parça üzərində mozaika, keramika, xalça, toxuma, gil və balıqqulağı ilə işləmələr, muncuqla işlənmiş bəzək əşyaları daxildir.