İncəsənət

Ana səhifə

İncəsənət

Akademik Milli Dram Teatrı növbəti teatr mövsümü üçün yeni tamaşalar hazırlayır

21 oktyabr 2009 04:22 (UTC +04:00)

Bakı. Ülkər Qasımova - APA. Azərbaycan Dövlət Akademik Milli Dram Teatrı 137-ci mövsümündə bir sıra yeni tamaşalar hazırlayacaq.

Teatrın mətbuat xidmətindən APA-ya verilən məlumata görə, hazırda məşhur detektiv əsərlər ustası Aqata Kristinin “Tələ” əsəri üzərində məşqlər başa çatmaq üzrədir və noyabrda tamaşanın təqdimatının keçirilməsi planlaşdırılır. Tamaşada xalq artistləri Zərnigar Ağakişiyeva, Ramiz Məlik, Rafiq Əzimov, əməkdar artistlər Sənubər İsgəndərova, Elxan Quliyev, Abbas Qəhrəmanov, artistlər Vəfa Rzayeva, Mətləb Abdullayev və başqaları rol alacaqlar. Səhnə əsərinin quruluşçu rejissoru əməkdar incəsənət xadimi Əsgər Əsgərovdur.

Teatr truppasının hazırladığı növbəti səhnə əsəri qırğız yazıçısı və dramaturqu Çingiz Aytmatovun “Çingiz xanın ağ buludu” əsəridir. Əsərdə böyük sərkərdənin həyatında baş verən tarixi hadisələrdən bəhs edilir. Tamaşada baş rolları xalq artistləri Ramiz Novruz, İlham Əsgərov, əməkdar artistlər Əli Nur, Elxan Quliyev və başqaları ifa edəcəklər. Tamaşanın quruluşçu rejissoru Rövşən Almuradlıdır.

Hazırda teatrda baş rejissor Mərahim Fərzəlibəyovun quruluşunda yunan dramaturqu Sofoklun “Antiqona” faciəsi əsasında eyniadlı tamaşa hazırlanır. Tamaşada xalq artisti Səyavuş Aslan, əməkdar artistlər Münəvvər Əliyeva, Əsgər Məmmədoğlu, aktyorlar Aslan Şirinov, Əminə Babayeva rol alıblar. Bundan başqa, balaca tamaşaçılar üçün Xanım Həsənovanın “Tülkü, Tülkü, tünbəki…” pyesinin səhnələşdirilməsinə başlanılıb. Vaqif İbrahimoğlunun quruluş verdiyi tamaşa bu ilin sonunda təqdim olunacaq.