İncəsənət

Ana səhifə

İncəsənət

Azərbaycanlı aktrisa Məlahət Abbasova Atatürk haqqında filmdə böyük öndərin bacısı Makbulə obrazını canlandırır - EKSKLÜZİV - FOTOSESSİYA

Azərbaycanlı aktrisa Məlahət Abbasova Atatürk haqqında filmdə böyük öndərin bacısı Makbulə obrazını canlandırır - <font color=red>EKSKLÜZİV - FOTOSESSİYA</font>

03 dekabr 2009 12:00 (UTC +04:00)

Bakı. Ülkər Qasımova – APA. Türkiyədə yaşayan azərbaycanlı aktrisa Məlahət Abbasova Mustafa Kamal Atatürkün həyatı ilə bağlı çəkilən filmdə cümhuriyyətin qurucusunun bacısı Makbulə obrazını canlandırır. Məlahət Abbasova APA-ya eksklüziv açıqlamasında bildirib ki, artıq iki aya yaxındır məşhur ictimai-siyasi xadim, bəstəkar, müğənni, UNESCO-nun xoşməramlı səfiri Zülfü Livanəli böyük şəxsiyyətin həyatından bəhs edilən “Vida” adlı filmin çəkilişlərinə başlayıb. “Vida”nın ssenaristi və rejissoru olan Z. Livanəli filmin musiqisinin də müəllifidir.

M. Abbasova hazırda çəkilişlərin İzmir şəhərində davam etdirildiyini deyib: “Filmin arxa planında Hollivuddan gəlmiş texniki heyət çalışır. Filmin prodüseri daha əvvəlki işlərində böyük nailiyyətlər qazanan Sevda Kayqısız və Özkan İpəkdir. Mənə bu filmdə Atatürkün bacısı Makbulə rolu həvalə edilib. Bu filmlə bağlı görüşə çağırılanda inanmadım. Yol boyunca Allaha yalvarırdım ki, kaş məni bu filmdə ən balaca rola belə qəbul etsinlər. Çünki Atatürk adı bütün Türkiyə üçün olduğu kimi, bizim ailə üçün də çox mühümdür. Üstəlik, Türkiyənin belə sıxıntılı dönəmində bu filmdə rol almaq çox şərəfli işdir. Bir neçə il əvvəl Bakıya da gələn Zülfü Livanəli ilə çalışmaq da hər kəsə qismət olan şey deyil. Məni ilk dəfə görəndə və azərbaycanlı olduğumu biləndə gözləri güldü. Mənə Bakı xatirələrini danışdı, Azərbaycan yeməklərini çox sevdiyini söylədi. Görüşdən bir müddət sonra prodüser Sevda xanım məni çağıraraq “Təbrik edirəm, bu filmdə Atatürkün bacısı Makbuləni oynayacaqsan” dedikdə, sevincimdən ağladım. Ən böyük aktyorların prodüserə telefon edib “nə olur, bizi kiçik rol da olsa, bu filmdə oynadın” dediyini bildiyim üçün heç ümidim yox idi. Bu filmin ssenarisi Atatürkün ən yaxın dostu və silahdaşı, Atatürk öldüyü zaman özünü silahla ürəyindən vuran, daha sonra sağalan Salih Bozokun xatirələrindən seçilərək yazılan ilk gerçək ssenaridir”.

Azərbaycanlı aktrisa filmdə Makbulənin 27, 36 və 53 yaşındakı halını oynadığını söyləyib: “Bu qədər aktrisanın içindən Atatürkün bacısı roluna seçilmək, sənət həyatımda o ailənin bir parçası olmaq mənim üçün şərəfdir. Azərbaycanlı qızı kimi də qürur duydum. Dünən çox duyğulu səhnəni çəkdik. Həmin səhnədə Atatürk öldüyü zaman baş ucunda Makbulə vardı. 53 yaşlı Makbuləni oynamaq mənim üçün çox həyəcanlı idi. Dünya şöhrətli qrim ustası məni Makbuləyə elə oxşatdı ki, özüm-özümü tanıya bilmədim”.

Qeyd edək ki, “Vida” filmində Mel Gibsonun çəkdiyi “Apokalipto” filmi ilə 2007-ci ildə “Oscar” və “Emmy” mükafatı alan saç və qrim ustaları çalışır. Qrim işinə Vittorio Sodano, saç işinə isə Aldo Siqnoretti rəhbərlik edir. 15 nəfərlik qrup təxminən 2 ton yüklə Türkiyəyə gəlib. Film üçün 400-dən çox kostyum hazırlanıb. Filmin operatoru tanınmış alman mütəxəssis Peter Stryugerdir. Rolların hamısını türklər ifa edir. Atatürkün gəncliyini aktyor Sinan Tuzcu, yaşlandığı illəri jurnalist Burhan Güvən, Atatürkün həyat yoldaşı Lətifə xanımı isə “Canım ailəm” serialının Fəridəsi Ezgi Mola canlandırır. Filmin 2010-cu ilin baharında təqdim edilməsi planlaşdırılır.