İncəsənət

Ana səhifə

İncəsənət

Bakıda Misir Film Həftəsinin açılış mərasimi keçirilib

21 dekabr 2009 15:51 (UTC +04:00)

Bakı. Ülkər Qasımova - APA. Dekabrın 21-də Azərbaycan Kinematoqrafçılar İttifaqında Misir Film Həftəsinin açılış mərasimi keçirilib. APA-nın məlumatına görə, Misir Ərəb Respublikasının Azərbaycandakı Misir Mədəniyyət Mərkəzinin direktoru Adil Dərviş bildirib ki, bu cür tədbirlər iki ölkə arasında mədəni əlaqələrin genişlənməsində böyük rol oynayır. Onun sözlərinə görə. Film Həftəsi Misir Ərəb Respublikasının və Mədəniyyət və Turizm Nazirliyinin dəstəyi ilə həyata keçirilir və dekabrın 25-dək davam edəcək: “Kino insanlar arasındakı yaxınlaşmanı və qarşılıqlı təcrübə qazanmaq üçün bir vasitədir. Kino sahəsi eyni zamanda özünüifadə vasitəsidir. Bu günə kimi Misirdə 3000-ə qədər ekran əsəri çəkilib. Misir bu günə qədər istehsal etdiyi filmləri ilə dünya miqyasında özünəməxsus yer tutur. Burada nümayiş olunacaq filmlər yeni və müasir filmlərdir və bu filmlər Qahirədə keçirilən müxtəlif beynəlxalq festivallarda mükafatlara layiq görülüb”. O bildirib ki, beş gün müddətində Misir rejissorlarının “Afrikano”, “Mafiya”, “Çətin günlər”, “Növbəti bəyan bizə gəldi” və “Böyük əzəmətli Çin fulu” filmləri nümayiş etdiriləcək. Filmlərin nümayişi isə Azərbaycan Kinematoqrafçılar İttifaqının kino zalında gerçəkləşəcək.

Açılış mərasimində çıxış edən Misir Ərəb Respublikasının Azərbaycandakı səfiri Sabir Əbdülqədir Mənsur Azərbaycanda Misir Film Həftəsini açmaqdan böyük fəxr hissi duyduğunu vurğulayıb: ”Misir kinosunun 100-dən çox yaşı var. Bu cür tədbirləri keçirməkdə məqsəd Azərbaycan tamaşaçısını Misir mədəniyyəti ilə tanış etməkdir. Bu cür tədbirlər iki ölkə arasında mədəni əlaqələrin inkişafında böyük rol oynayır”.

Dövlət Film Fondunun direktoru, əməkdar incəsənət xadimi Cəmil Quliyev də Bakıda bu gün start götürən Misir Film Həftəsini yüksək qiymətləndirib. Çıxışlardan sonra “Afrikano” filmi göstərilib.