İncəsənət

Ana səhifə

İncəsənət

Maqbet Bünyatov və Mərahim Fərzəlibəyov Bəsti Cəfərovanın ittihamlarına cavab verib

14 yanvar 2010 14:13 (UTC +04:00)

Bakı. Ülkər Qasımova - APA. Azərbaycan Dövlət Akademik Milli Dram Teatrının aktrisası, xalq artisti Bəsti Cəfərovanın bir neçə gün əvvəl APA-ya verdiyi müsahibəsində səsləndirdiyi ittihamlara teatrın direktoru Maqbet Bünyatov və baş rejissoru Mərahim Fərzəlibəyov münasibət açıqlayıb. M. Bünyatov APA-ya açıqlamasında hamını səmimi olmağa səsləyib: “İstəyim odur ki, böhtana əl atmasınlar, səmimi olsunlar. Mənim qədər Bəsti Cəfərovaya doğmalıq edən ikinci adam tanımıram. Bura teatrdır, teatrın öz repertuarı olur. Bəstinin öz yeri, Nurəddinin öz yeri...” M. Bünyatov istedadlıların qarşısının kəsilməsi və onların qılınclanmasına dair B. Cəfərovanın ittihamlarının əsasının olmadığını qeyd edib: “Burda hansı istedadlı aktyor qılınclanıb? Məni bu teatra dəvət ediblər gəlmişəm, göydən düşməmişəm. Kiminsə ayrı-ayrı şəxsləri rəhbər kimi görmək istəməsi ilə deyil ki, burda 260 nəfər işləyir. Məsləhət olacaqsa, bundan sonra da işləyəcəyəm. Pul söhbəti məni iyrəndirir və mən o səviyyəyə enmək istəmirəm. Kim gəlib bizə pul verib?! Eyibdir. Bu məsələnin axı direktora heç aidiyyəti yoxdur. Mən burada işləyəndən yalnız dramaturqların əsərlərinə müraciət etmişik. Rejissorların işinə müdaxilə eləmirəm. Ancaq lazım bildiyimdə məsləhətlər verirəm. Onu da bildirmək istəyirəm ki, bütün bu deyilənlərdən özümə ibrət dərsi götürürəm. Özümə uyğun olanları qəbul edirəm, uyğun olmayanları mənə şamil etməsinlər. Mən 50 illik stajı olan adamam, öz imicimi nəyə görəsə quran verə bilmərəm”.

M. Fərzəlibəyov isə APA-ya açıqlamasında B. Cəfərovanın çox gözəl aktrisa olduğunu, hər zaman bu teatrda Bəsti xanımın üzərində böyük əsərlər qoyulduğunu deyib: “Aktrisa bundan sonra da yaradıcılığını bu teatrda geniş şəkildə davam etdirəcək. Lakin o, müsahibəsində hazırda repertuarda olan dörd əsəri - “Kaş araba aşmayaydı”, “Müsyö Jordan və Dərviş Məstəli şah”, “Xurşudbanu Natəvan” və “İnsan səsi” tamaşalarının adını çəkməyi unudub. Nazirlik tərəfindən verilən rollara gəlincə, aktrisadır, arzusunu bildirib və arzusu reallaşıb. “Fedra” əsərində nazir onu məsləhət bildi, rejissor kimi bu əsəri qoymaq mənə təklif olundu. Mən də çox həvəslə o tamaşanı səhnələşdirdim. Amma “Kaş bu araba aşmayaydı” və “Xurşudbanu Natəvan” teatrın özünün, “Müsyö Jordan və Dərviş Məstəli şah” və “İnsan səsi” isə bizim diplomçu gənc rejissorların əsərləridir. Ola bilər ki, Mədəniyyət və Turizm Nazirliyi bizim istedadlı xalq artistlərimizə dəstək olur, bu çox gözəl haldır”. M. Fərzəlibəyov B. Cəfərovanın 50 illik yubileyinin işlədiyi teatr tərəfindən qeyd olunmaması məsələsinə də aydınlıq gətirib: “Bəsti xanımın 50 illik yubileyinin keçirilməsi teatr rəhbərliyi tərəfindən onun özünə təklif olundu, lakin Bəsti xanım dedi ki, teatrın binası təmirdədir, o da buna görə 50 illiyinin qeyd edilməsini istəmir. Maqbet Bünyatovun rəhbərliyinə gəlincə, o, 50 ildir teatr sahəsində çalışır. Maqbet müəllimlə mənim münasibətim hər zaman yaradıcı olub və o mənə bir rəhbər kimi yaradıcı məsləhətlər verir. Onun mənim işimə qarışması, rollar bölməsi, pyeslər seçməsi ilə bağlı iradların heç biri düzgün deyil”. Baş rejissor teatrın rəhbərinin heç zaman onun işinə qarışmadığını da dilə gətirib: “Müdir birbaşa mənim işimə qarışmır, çalışır ki, mənə dəstək olsun. Biz Maqbet müəllimlə 4 ildir, birgə çalışırıq və bu müddət ərzində nə yaradıcı, nə şəxsi konfliktimiz olub, ola da bilməz. Hazırda teatr binası təmirdə olmasından dolayı məhdudlaşdırılmış şəkildə işləyirik. Buna baxmayaraq, təmir müddətində çətinliklə dörd tamaşanın premyerasını keçirmişik”.

B. Cəfərovanın rejissorların maddiyyatla klassik, baş rolları qeyri-peşəkarlara verməsi fikrinə gəlincə, teatrın baş rejissoru bu fikirlərə qəti şəkildə etiraz edib: “Pul alıb rol verən rejissorların adını çəkmək lazımdır. Əgər belə hal varsa, bu, məhkəməlik bir işdir. Mən baş rejissoram, heç zaman istedada qarşı çıxmamışam. Heç bir aktyor deyə bilməz ki, kimdənsə nəsə alınıb. Bu mümkün deyil. Əgər söhbət “Antonio və Kleopatra” əsərindən gedirsə, necə ki, “Fedra” əsərində nazirlik Bəstiyə dəstək oldu, eləcə də “Misir gecələri” adı altında hazırlanan “Antonio və Kleopatra” tamaşasında vaxtilə Məleykə Əsədovaya dəstək olmuşdu və o əsər teatrda dövlət sifarişi kimi hazırlanmışdı. Rolların satılması barədə deyilənlər böhtandır. Bəlkə kimsə bunu edir, mənim xəbərim yoxdur. Biz yeddi rejissoruq, aramızda beləsi varsa, adını desinlər. Bu rejissorların hər biri ləyaqətli insandır, “Şöhrət” ordenlidir, xalq artistidir. Bu sözü ümumiləşdirilmiş şəkildə demək düzgün deyil. Şəxsən, mən heç kimə tapşırıqla rol verməmişəm, ömrü boyu da ola bilməz. Yenə deyirəm, belə rejissor varsa, adını desinlər. Kimdir o adam? Axı bu formada hamıya ləkə yaxmaq olmaz. Eyibdir...”

M. Fərzəlibəyov sonda B. Cəfərovanın yaradıcılığının hər zaman öndə olduğunu bildirib: “Bəsti Cəfərova böyük və istedadlı aktrisa kimi teatrda sayılıb və sayılacaq, bundan sonra da ona rollar veriləcək. Mən Bəsti ilə çox əsər işləmişəm və bu cür iş birlikləri hələ çox olacaq”.