İncəsənət

Ana səhifə

İncəsənət

Azərbaycanda iki cizgi filminin istehsalına 90 min ABŞ dolları xərclənib

16 yanvar 2010 10:39 (UTC +04:00)

Bakı. Ülkər Qasımova - APA. Yanvarın 16-da Dövlət Film Fondunun nəzdində yaradılmış Uşaq Kino Evində “Mən kino çəkirəm” mövzusunda uşaq rəsmləri sərgisinin qaliblərinin mükafatlandırılması və “Cizgi filmləri aləminə səyahət” adlı kinoklub keçirilib.

APA-nın məlumatına görə, tədbirdə tanınmış cizgi filmləri rejissoru, əməkdar incəsənət xadimi Elçin Hami Axundovla görüş, eləcə də onun “Cavanşir” və “Qızıl” cizgi filmlərinin təqdimatı da baş tutub.

Tədbirdə çıxış edən Dövlət Film Fondunun direktoru, əməkdar incəsənət xadimi Cəmil Quliyev tədbirin önəmini qeyd edərək, istifadəyə verilən Uşaq Kino Evində azyaşlı tamaşaçıları daha tez-tez sevindirmək üçün lazımi tədbirlərin həyata keçiriləcəyinə söz verib. Fond rəhbəri qeyd edib ki, “Mən kino çəkirəm” mövzusunda uşaq rəsmləri müsabiqəsinə ümumilikdə 150 rəsm işi təqdim edilib və onların arasından 3 qalib seçilib. Tədbirdə 3 qalibə diplomlar və hədiyyələr təqdim edilib.

Cizgi filmləri rejissoru, əməkdar incəsənət xadimi Elçin Hami Axundov isə çəkdiyi “Cavanşir” və “Qızıl” animasiya filmləri barədə məlumat verib: “Cizgi filmlərindən biri “Cavanşir” 2002-ci ilin istehsalıdır və bu animasiya filminə 40 min ABŞ dolları vəsait xərclənib. Cizgi filminin ssenari müəllifi və rejissoru özüməm. Quruluşçu rəssamı Gülşən Quliyeva, musiqi tərtibatçısı İsmayıl Dadaşovdur. Bu cizgi filmi Qarabağdan bəhs edir”.

E.H.Axundovun sözlərinə görə, ikinci animasiya filmi olan “Qızıl” 50 min ABŞ dollarına başa gəlib. Cizgi filminin ssenari müəllifi Yusif Şeyxov, bəstəkarı Mobil Babayevdir. “Qızıl” animasiya filmi 2004-cü ilin istehsalıdır.

Daha sonra tədbirin azyaşlı iştirakçıları üçün adı çəkilən animasiya filmləri nümayiş etdirilib.