İncəsənət

Ana səhifə

İncəsənət

Azərbaycan teatr və kino sənətində unudulmaz rollar yaradan korifey aktrisa Səfurə İbrahimova heç kimlə görüşmək istəmir - FOTO

Azərbaycan teatr və kino sənətində unudulmaz rollar yaradan korifey aktrisa Səfurə İbrahimova heç kimlə görüşmək istəmir - <font color=red>FOTO </font>

22 yanvar 2010 09:39 (UTC +04:00)

Bakı. Ülkər Qasımova-APA. Azərbaycanın teatr və kino tarixində öz dəsti-xətti ilə seçilən, tamaşalarda yaratdığı hər bir rola möhürünü qoyan, səhnə məlahəti ilə həmişə tamaşaçıları heyran qoyan Azərbaycanın xalq artisti, dövlət mükafatı laureatı, prezident təqaüdçüsü Səfurə İbrahimovanı səhhətində problemlər yaranıb. Məhz elə bu səbəbdən Səfurə İbrahimova hazırda ev şəraitində həkim nəzarətindədir. Məhz səhhətindəki problemlərdən dolayı da Azərbaycanın korifey sənətkarı atıq bir neçə ildir ki, evinə heç kimi qoymur və heç kimlə görüşmək istəmir. APA-nın aktrisanın səhhətindəki problemlərlə əlaqədar olaraq onunla əlaqə saxlamaq istəyi də boşa çıxıb.

Azərbaycan Dövlət Akademik Milli Dram Teatrının direktoru, əməkdar mədəniyyət işçisi Maqbet Bünyatov APA-ya açıqlamasında S. İbrahimovanın artıq neçə ildir ki, heç bir telefon zənglərinə cavab vermədiyini bildirib. Maqbet Bünyatov Səfurə xanım İbrahimova ilə 70-80-cı illərdən tanış olduğunu, ancaq uzun zamandır onunla görüşə bilmədiyini qeyd edib: “Daima Səfurə xanımın yaradıcılığını, rollarını izləmişəm. Bilirsiniz ki, Səfurə xanım teatrda da, kinoda da yaratdığı hər bir rola möhür vurub. Mən bu teatra rəhbər gələndə artıq Səfurə xanım teatrdan ayrılmışdı. Buna baxmayaraq bir neçə dəfə onu teatra dəvət etdik, evinə getməyə cəhd elədik, ancaq bu, bizə nəsib olmadı. Bu cəhdlərim onunla ancaq bir neçə dəfə telefonla danışmağımla nəticələndi. Səfurə xanıma teatra qayıtmasını təklif etdim və bildirdim ki, çox yaxşı olar ki, müqavilə əsasında yaşına və təcrübəsinə uyğun tamaşalarda oynasın. Ancaq o, səhhətində problem olduğunu bildirdi”.

Teatr rəhbərinin sözlərinə görə, Səfurə İbrahimova hazırda ancaq Dövlət Akademik Milli Dram Teatrının rejissor köməkçisi Rəfiqə xanımın onun evinə gəlməsinə razılıq verir. M. Bünyatov isə aktrisanın durumundan ancaq Rəfiqə xanım vasitəsi ilə xəbər tutur: “Onun səhhətindəki problem barədə danışa bilmirəm. Bunu ancaq onun həkimi bilir. Onunla görüşmək mümkün olmayıb, çünki bizi qəbul etməyib”. Teatr rəhbərinin sözlərinə görə, iki il bundan əvvəl S. İbrahimovanın 70 yaşı olanda teatr onun üçün gül dəstəsi və xüsusi tort hazırlatsa da, Səfurə İbrahimova heç yubiley günündə də teatrdan gələn qonaqları qəbul etməyib, yalnız Rəfiqə xanımla görüşüb.

Onu da öyrəndik ki, artıq neçə müddətdir Səfurə İbrahimova prezident təqaüdünü almağa belə getmir. Səfurə İbrahimova çox qısamüddətli ailə qursa da, övladı olmayıb. Ailəsinin dağılmasına isə səbəb həyat yoldaşının görkəmli aktrisanı “ya sənət, ya ailə” seçimi qarşısında qoyması olub. S. İbrahimova isə sənəti seçib.

Qeyd edək ki, Səfurə İbrahimova 1938-ci il dekabrın 27-də Bakıda anadan olub. 1960-cı ildə M. Əliyev adına Azərbaycan Dövlət Teatr İnstitutunun dram və kino aktyorluğu fakültəsinə qəbul olub. Həmin ildən də ona bir neçə rol tapşırılıb və tələbə-aktrisa Akademik Teatrın truppasına qəbul edilib. Səhnə məlahəti və səhnə cazibəsi ilə həmişə tamaşaçıları heyran qoyan, teatrşünaslığın diqqət mərkəzində olan aktrisa bu illər ərzində teatrda Hüseyn C avidin “Səyavuş” əsərində gəlin, “Knyaz”da Jasmen, “İblis”də Rəna, Sabit Rəhmanın “Sevimli rollar” əsərində Mələk, “Toy”da Kamilə, “Əliqulu evlənir”də Qumral, “Xoşbətlər”də İnci, “Küləklər”də Roza, M. Hüseynin “Alov” əsərində Əsmər, Səməd Vurğunun “Vaqif” əsərində Gülnar, “İnsan”da Tatyana, İlyas Əfəndiyevin “Sən həmişə mənimləsən” əsərində Sarısaç qız, “Sevgililərin cəhənnəmdə vüsalı”nda Mədinə, “Hökmdar və qız”ında Tubu xanım, Bəxtiyar Vahabzadənin “Kimdir haqlı” əsərində Həyat, Vilyam Şekspirin “Hamlet” əsərində Ofeliya, Lorkanın “Dişi canavar”ında Prudensiya, Cəlil Məmmədquluzadənin “Anamın kitabı”nda Zəhra bəyim, Vidadi Babanlının “Ana intiqamı”nda Səltənət, Nəriman Həsənzadənin “Atabəylər” əsərində ikinci xatun, Anarın “Adamın adamı” əsərində Balaxanım, Cəfər Cabbarlının “Sevil” əsərində Sevil, Əli Əmirlinin “Köhnə ev” əsərində Mələk və başqa bu kimi sanballı rollar yaradıb.

10-dan çox televiziya tamaşasında oynamış aktrisanın ən yaddaqalan ekran obrazlarından biri İlyas Əfəndiyevin “Sən həmişə mənimləsən” lirik-psixoloji dramında yaratdığı Nəzakət obrazıdır.

Aktrisa müxtəlif illərdə “Azərbaycanfilm” kinostudiyasında “Sevil” (Dilbər), “Arşın mal alan”(Telli) “Qatır Məmməd” (Həbibə), “Alma almaya bənzər” (Mədinə), “Qaynana (Sədaqət), “Dərviş Parisi dağıdır” (Gülpəri) və başqa bədii filmlərə çəkilib.

Səfurə İbrahimova Hüseyn Cavidin “İblis” faciəsində oynadığı Rəna roluna görə 1984-cü ildə Azərbaycan Respublikasının dövlət mükafatına, 1974-cü ildə əməkdar artist, 2002-ci ildə isə xalq artisti fəxri adlarına layiq görülüb.

Səfurə İbrahimovanın səhhətində problemlər yarandığından o, 2005-ci ildə teatrdan uzaqlaşıb. 2008-i il dekabrın 27-də aktrisanın 70 yaşı tamam olub.