İncəsənət

Ana səhifə

İncəsənət

Rəssam Natiq Fərəcullazadənin 50 illik yubileyinə həsr olunmuş sərgisi açılıb

22 yanvar 2010 16:11 (UTC +04:00)

Bakı. Ülkər Qasımova – APA. Bu gün Azərbaycan Rəssamlar İttifaqının Vəcihə Səmədova adına Sərgi Salonunda rəssam Natiq Fərəcullazadənin 50 illik yubileyinə həsr olunmuş sərgisinin açılışı keçirilib.

APA-nın məlumatına görə, sərgidə çıxış edən Rəssamlar İttifaqının katibi, xalq rəssamı Ağəli İbrahimov yubilyarın həyat və yaradıcılığından danışıb. O bildirib ki, sərgidə rəssamın 100-ə yaxın rəngkarlıq və qrafika janrında əsərləri nümayiş etdirilir: “Natiq iki gündən sonra 50 yaşını qeyd edəcək. O, yaradıcılığı və çox gözəl insani xüsusiyyətləri ilə hər zaman fərqlənib. Hər bir əsəri bir gözəlliklə əhatələnib”.

İttifaqın katibi, əməkdar rəssam Ənvər Qarayev də yubilyar rəssamın peşəkarlığından və bunun bütün əl işlərindən məlum olduğunu vurğulayıb. Ə.Qarayevin sözlərinə görə, dünyanın bir çox ölkələrində azərbaycanlı rəssamın sərgiləri açılıb.

N.Fərəcullazadə isə yaradıcılığına göstərilən diqqətə görə Azərbaycan Rəssamlar İttifaqına təşəkkürünü bildirib. Rəssamdan onu da öyrəndik ki, sərgidə nümayiş olunan əsərlər satış üçün nəzərdə tutulmayıb, ancaq nümayiş olunan əsərlərin ən ucuzu 500, ən bahası 10 000 manatdır.

Sərginin nümayişi yanvarın 28-nə kimi davam edəcək.